ડાંગ જિલ્લામાં નવરાત્રિના પર્વ દરમિયાન 30થી વધુ આદિવાસી પરિવારોએ સનાતન હિંદુ ધર્મમાં ઘરવાપસી કરી છે. આ પરિવારોના 100થી વધુ સભ્યોએ માયાદેવી મંદિર ખાતે યોજાયેલા એક કાર્યક્રમમાં ભાગ લીધો હતો.
મળતી માહિતી અનુસાર, આ પરિવારો વર્ષો પહેલાં અમુક કારણોસર ખ્રિસ્તી ધર્મમાં જોડાયા હતા. માયાદેવી મંદિર ખાતે કૃષ્ણદાસ બાપુની ઉપસ્થિતિમાં આ કાર્યક્રમ યોજાયો હતો, જેમાં આદિવાસી પરિવારો માટે વિશેષ વિધિ કરવામાં આવી હતી.
આ પ્રસંગે ઘણા ગ્રામજનો અને ધાર્મિક આગેવાનો પણ ઉપસ્થિત રહ્યા હતા. કાર્યક્રમમાં સામેલ થયેલા પરિવારોએ જણાવ્યું કે તેમણે પોતાની સ્વેચ્છાએ આ નિર્ણય લીધો છે.
પરત ફરેલા એક વ્યક્તિએ પોતાનો અનુભવ વર્ણવતાં કહ્યું કે, "દુઃખ સમયે મારે ખ્રિસ્તી ધર્મમાં જોડાવું પડ્યું હતું. જોડાયા પછી બે-ત્રણ વર્ષ સુધી મેં તે ધર્મનું પાલન કર્યું. પરંતુ તેમાં મને સંતોષ ન થયો, તેથી માયાદેવી મંદિરે યોજાયેલા આ કાર્યક્રમમાં અમે જોડાયા. હવે હિંદુ ધર્મમાંથી કદી દૂર નહીં જવાની અમે પ્રતિજ્ઞા લીધી છે."