ડાંગ જિલ્લામાં અપૂરતા વરસાદને કારણે ખેડૂતોની હાલત કફોડી બની છે. પાકને પિયત આપવા માટે પાણીનો કોઈ સ્રોત ન હોવાથી મોંઘા બિયારણો અને મહેનતથી વાવેલો પાક સુકાઈ રહ્યો છે. આ સ્થિતિમાં ડાંગ જિલ્લાના ખેડૂતોએ પાક નુકસાનનું વળતર માગવા માટે બહુજન સમાજ પાર્ટીના નેતૃત્વમાં ધરણા કર્યા હતા.
ખેડૂતોએ 26 ઓક્ટોબરે કલેક્ટરને આવેદનપત્ર પાઠવ્યું હતું, પરંતુ આજદિન સુધી કોઈ લેખિત જવાબ ન મળતાં તેમણે ફરીથી મુખ્યમંત્રીને રિમાઈન્ડર આવેદનપત્ર પાઠવ્યું છે. ખેડૂતોની મુખ્ય માંગ છે કે ડાંગ જિલ્લાના 311 ગામોમાં પાક નુકસાનનો સરવે કરાવી જિલ્લાને દુષ્કાળગ્રસ્ત અથવા નુકસાનીગ્રસ્ત જાહેર કરવામાં આવે અને હેક્ટર દીઠ નુકસાનના પ્રમાણ મુજબ યોગ્ય વળતર આપવામાં આવે.
ખેડૂતોએ અગાઉ આપેલા આવેદનપત્ર પર શું કાર્યવાહી થઈ તેની લેખિત જવાબ આપવાની પણ માંગ કરી છે. તેમણે ચેતવણી આપી છે કે જો સરકાર યોગ્ય વળતર નહીં આપે તો ખેડૂતો ભૂખ હડતાળ પર ઉતરશે.
ઉલ્લેખનીય છે કે ચાલુ વર્ષે અપૂરતા વરસાદને કારણે રાજ્યના અનેક જિલ્લાઓમાં પાણીની અછત સર્જાઈ છે. ખેડૂતો ઉપરાંત પશુપાલકો પણ પ્રભાવিত થયા છે, કારણ કે તેમનાં માલઢોરને પીવડાવવા માટે પણ પાણી ઉપલબ્ધ નથી.