ભારત સામે હાલ બે મોટા હવામાન પડકારો ઊભા થયા છે. એક તરફ પ્રશાંત મહાસાગરમાં અલ નિનો મજબૂત બની રહ્યો છે, તો બીજી તરફ બંગાળની ખાડીમાં ચક્રવાતી તોફાનની શક્યતા છે. હવામાન વિભાગના જણાવ્યા અનુસાર, બંગાળની ખાડીમાં નીચા દબાણવાળી સિસ્ટમ મજબૂત બનીને ઊંડા ડિપ્રેશનમાં કે ચક્રવાતમાં ફેરવાય તો તેને 'અર્નબ' નામ આપવામાં આવશે. આ સિસ્ટમ 25 સપ્ટેમ્બર સુધી સક્રિય રહી શકે છે.
દરિયાકાંઠાના રાજ્યોમાં ભારે વરસાદની ચેતવણી
આ સ્થિતિને કારણે ઓડિશા અને ઉત્તર આંધ્રપ્રદેશ સહિત અનેક દરિયાકાંઠાના રાજ્યોમાં ભારે વરસાદ અને તેજ પવનનું જોખમ વધ્યું છે. અલ નિનોની અસર પહેલેથી જ દેશના ઘણા ભાગોમાં દુષ્કાળ અને ઓછા વરસાદનો ભય ઊભો કરી રહી છે. આ બે પરિબળોના સંયોજનથી ભારતના હવામાન પર ગંભીર અસર પડી શકે છે. ભારતીય હવામાન વિભાગ (IMD)ના જણાવ્યા અનુસાર, આંદામાન સમુદ્રમાં નીચા દબાણવાળો વિસ્તાર આગામી બે દિવસમાં વધુ મજબૂત બનશે. તે 21 સપ્ટેમ્બરે ડિપ્રેશન અને 22 સપ્ટેમ્બરે ઊંડા ડિપ્રેશનમાં ફેરવાઈ શકે છે. 23 સપ્ટેમ્બર સુધીમાં તે આંધ્રપ્રદેશ-દક્ષિણ ઓડિશા કિનારા નજીક પશ્ચિમ-મધ્ય અને ઉત્તર-પશ્ચિમ બંગાળની ખાડી સુધી પહોંચે તેવી ધારણા છે.
ઓડિશા અને ઉત્તર આંધ્રપ્રદેશ માટે ખાસ ચેતવણી
જો સિસ્ટમ વધુ તીવ્ર બને તો તે ચક્રવાત 'અર્નબ'માં પરિણમી શકે છે. હવામાન નિષ્ણાતોના મતે, હાલની પરિસ્થિતિ એવી છે કે આ સિસ્ટમ ઝડપથી વિકસી શકે છે. તેથી દરિયાકાંઠાના વિસ્તારોમાં સાવધાની રાખવી જરૂરી છે. હવામાન વિભાગે દક્ષિણ ઓડિશા અને ઉત્તર દરિયાકાંઠાના આંધ્રપ્રદેશ માટે ખાસ ચેતવણી જારી કરી છે. 23 અને 24 સપ્ટેમ્બરના રોજ આ વિસ્તારોમાં કેટલાક સ્થળોએ ભારેથી અતિ ભારે વરસાદ પડી શકે છે.
24 સપ્ટેમ્બરના રોજ દક્ષિણ છત્તીસગઢમાં અલગ-અલગ સ્થળોએ ભારે વરસાદની આગાહી છે. 23થી 25 સપ્ટેમ્બર દરમિયાન છત્તીસગઢ અને તેલંગાણામાં અને 24-25 સપ્ટેમ્બરે વિદર્ભમાં ભારેથી અતિ ભારે વરસાદ પડી શકે છે.
23-24 સપ્ટેમ્બરના રોજ ઓડિશામાં 50-60 કિમી/કલાકની ઝડપે પવન ફૂંકાશે, જે ક્યાંક 70 કિમી/કલાક સુધી પહોંચી શકે છે. 23 સપ્ટેમ્બરે દક્ષિણ ઓડિશા અને ઉત્તર આંધ્રપ્રદેશના દરિયાકાંઠે 55-65 કિમી/કલાકની ઝડપે પવન ફૂંકાશે. 23-24 સપ્ટેમ્બર દરમિયાન દક્ષિણ આંધ્રપ્રદેશ અને પશ્ચિમ બંગાળના દરિયાકાંઠે પણ જોરદાર પવન ફૂંકાવાની શક્યતા છે.
વધુ તકેદારી અને તૈયારીની જરૂર
જો ચક્રવાત 'અર્નબ' વિકસે તો તેની અસર ફક્ત વરસાદ સુધી મર્યાદિત નહીં રહે. જોરદાર પવન વૃક્ષો ધરાશાયી કરી શકે છે, વીજળીના થાંભલા પાડી શકે છે અને પરિવહનને ખોરવી શકે છે. દરિયાકાંઠાના વિસ્તારોમાં ઊંચા મોજાં પણ ઉછળી શકે છે.
આ પણ વાંચોઃ Weather update: આજે 7 રાજ્યોમાં ભારે વરસાદનું એલર્ટ, વાવાઝોડા-વીજળી સાથે ભારે વરસાદની આગાહી