બંગાળની ખાડીમાં સર્જાયેલું ચક્રવાતી વાવાઝોડું 'અર્નબ' અત્યંત ગંભીર સ્વરૂપ ધારણ કરીને ઝડપથી કિનારા તરફ આગળ વધી રહ્યું છે. ભારતીય હવામાન વિભાગ (IMD) અનુસાર, આ વાવાઝોડું 28 ઓક્ટોબરની સવારે આંધ્રપ્રદેશના બાપટલા અને વિશાખાપટ્ટનમ વચ્ચે, યનમ નજીકના દરિયાકાંઠે ત્રાટકવાની શક્યતા છે. લેન્ડફોલ સમયે દરિયાકાંઠાના વિસ્તારોમાં પવનની ઝડપ 125 થી 135 કિમી પ્રતિ કલાક રહી શકે છે, જ્યારે પવનના તેજ ઝાપટાં 170 કિમી પ્રતિ કલાક સુધી પહોંચવાનું અનુમાન છે.
વાવાઝોડાના પગલે આંધ્રપ્રદેશ, ઓડિશા, છત્તીસગઢ અને તેલંગાણા સહિત દેશના 10 રાજ્યોમાં ભારે વરસાઈ અને તોફાની પવનનું મોટું જોખમ તોળાઈ રહ્યું છે. હવામાન વિભાગે આ રાજ્યોમાં ઍલર્ટ જાહેર કર્યો છે.
ચક્રવાત અર્નબ હાલ પશ્ચિમ-મધ્ય બંગાળની ખાડીમાં સક્રિય રહી પશ્ચિમ-ઉત્તર-પશ્ચિમ દિશા તરફ આગળ વધી રહ્યું છે. કાંઠા પર પહોંચતાની સાથે જ દરિયામાં વિશાળ મોજાં ઉછળવાની અને નીચાણવાળા વિસ્તારોમાં પાણી ભરાવાની ભારે આશંકા છે. પૂર્વ ગોદાવરી જિલ્લાના કાકીનાડા અને યનમ આસપાસ દરિયાઈ જળસ્તરમાં નોંધપાત્ર વધારો થઈ શકે છે. સાવચેતીના ભાગરૂપે કાકીનાડા બંદરે તમામ માછીમારી બોટો લંગારી દેવાઈ છે અને માછીમારોને દરિયો ન ખેડવા કડક સૂચના અપાઈ છે.
વાવાઝોડાની અસરથી વિશાખાપટ્ટનમમાં ભારે પવન અને મુશળધાર વરસાદ શરૂ થઈ ગયો છે. શહેરના કોન્વેન્ટ જંકશન ખાતે રેલવે ટ્રેક નીચે બનેલા સબવેમાં પાણી ભરાઈ જવાથી વાહનવ્યવહાર ખોરવાયો છે. શહેરમાં અનેક સ્થળોએ વિશાળ વૃક્ષો ધરાશાયી થવાના અહેવાલ છે, જેમાં મહારાણીપેટા વિસ્તારમાં એક ઘર પર મોટું વૃક્ષ પડ્યું હતું. સરકારી ઈએનટી હોસ્પિટલ નજીક અને વાયએમસીએ બીચ વિસ્તારમાં ભારે પવન સાથે નુકસાન નોંધાયું છે, જ્યાં પાલિકા અને આપત્તિ વ્યવસ્થાપન ટીમો કાટમાળ હટાવી રસ્તાઓ ખુલ્લા કરી રહ્યા છે.
મુસાફરોની સલામતીને ધ્યાને રાખીને દક્ષિણ મધ્ય રેલવે (SCR) અને સાઉથ કોસ્ટ રેલવેએ વિશેષ સાવચેતીના પગલાં લીધા છે. તેલંગાણા અને આંધ્રપ્રદેશમાં ભારે વરસાદના રેડ ઍલર્ટને પગલે અસરગ્રસ્ત રૂટ પરથી પસાર થતી ઘણી ટ્રેનો રદ કરવામાં આવી છે અથવા તેમના રૂટ બદલવામાં આવ્યા છે. રેલવે પ્રશાસને મુસાફરોને મુસાફરી શરૂ કરતાં પહેલાં ટ્રેનનું સ્ટેટસ તપાસી લેવા અનુરોધ કર્યો છે.
ઓડિશાના ગંજમ સહિત દક્ષિણના 5 જિલ્લાઓમાં હવામાન વિભાગે રેડ ઍલર્ટ આપ્યો છે, જ્યાં 60થી 80 કિમી પ્રતિ કલાકની ઝડપે પવન ફૂંકાઈ શકે છે. ગંજમ જિલ્લામાં 922 જેટલા ગામોને સંવેદનશીલ જાહેર કરાયા છે અને 6,500થી વધુ લોકોને સલામત સ્થળે ખસેડવાની પ્રક્રિયા શરૂ થઈ છે. વહીવટીતંત્રે 110 કાયમી અને 1,000 અસ્થાયી આશ્રયસ્થાનો તૈયાર રાખ્યા છે, જ્યારે NDRF અને ODRAFની ટીમો તહેનાત કરી દેવાઈ છે. ગજપતિ જિલ્લામાં પડેલા વૃક્ષો હટાવીને ઇમરજન્સી ટીમોએ રસ્તાઓ પૂર્વવત કર્યા છે.
વાવાઝોડાની અસર મધ્ય અને પૂર્વ ભારતમાં પણ વિસ્તરી રહી છે. છત્તીસગઢમાં 28 ઑક્ટોબરના રોજ અતિભારે વરસાદની ચેતવણી સાથે નીચાણવાળા વિસ્તારોમાં પાણી ભરાવાની શક્યતા છે. ઝારખંડ અને પશ્ચિમ બંગાળમાં પણ એલર્ટ જાહેર કરાયો છે.