બંગાળની ખાડીમાંથી સર્જાયેલું અર્નબ ચક્રવાત ગુરુવારે મોડી રાત્રે 11થી 1 વાગ્યાની વચ્ચે ઉત્તર આંધ્ર પ્રદેશ અને દક્ષિણ ઓડિશાના દરિયાકાંઠે ટકરાયું. તેના કારણે બંને રાજ્યોના અનેક વિસ્તારોમાં ભારે વરસાદ પડી રહ્યો છે. ઓડિશામાં આશરે 5,000 લોકોને સુરક્ષિત સ્થળોએ ખસેડવામાં આવ્યા છે. દક્ષિણ જિલ્લાઓમાં ચારથી વધુ પુલ તણાયા છે અને રસ્તાઓ ધોવાઈ ગયા છે.
આંધ્ર પ્રદેશના શ્રીકાકુલમ જિલ્લાના કલિંગપટ્ટનમના અનેક વિસ્તારોમાં ભારે વરસાદ સાથે 75 કિમી પ્રતિ કલાકની ઝડપે પવન ફૂંકાયો. વિજયવાડામાં સવારથી સતત વરસાદ પડી રહ્યો છે, જેના કારણે નીચાણવાળા વિસ્તારોમાં પાણી ભરાઈ ગયું છે. શહેરની અનેક શાળાઓમાં સતત બીજા દિવસે રજા જાહેર કરવામાં આવી છે.
હવામાન વિભાગના જણાવ્યા અનુસાર, આ સિસ્ટમ છેલ્લા 6 કલાકમાં 3 કિમી પ્રતિ કલાકની ઝડપે પશ્ચિમ-ઉત્તરપશ્ચિમ દિશામાં આગળ વધી છે.
બીજી તરફ, પશ્ચિમ બંગાળના કેટલાક ભાગોમાં પણ ભારે વરસાદની આગાહી કરવામાં આવી છે. દાર્જિલિંગ અને કાલિમ્પોંગમાં ભૂસ્ખલનની ચેતવણી જાહેર કરવામાં આવી છે. પશ્ચિમ બંગાળના સાઉથ 24 પરગણામાં લો પ્રેશરની અસરને કારણે ભારે વરસાદ અને તેજ પવન ફૂંકાઈ રહ્યા છે. હવામાન વિભાગે અહીં ઓરેન્જ એલર્ટ જાહેર કર્યું છે. દરિયાકાંઠાના વિસ્તારોના લોકોને સતર્ક રહેવાની સલાહ આપવામાં આવી છે. માછીમારોને દરિયામાં ન જવાની ચેતવણી આપવામાં આવી છે.
ઉત્તર પ્રદેશમાં ત્રણ દિવસ બાદ ફરી ચોમાસાના વરસાદનો સિલસિલો શરૂ થયો છે. ગુરુવારે લખનઉ, ગોંડા, મહારાજગંજ, ઉન્નાવ અને પ્રયાગરાજમાં વરસાદ થયો. ગોંડામાં સવારે 4 વાગ્યાથી મુશળધાર વરસાદ પડી રહ્યો છે. હવામાન વિભાગ અનુસાર, 2 કલાકમાં જિલ્લામાં 10 એમએમ વરસાદ નોંધાયો છે. વહીવટીતંત્રએ ધોરણ 1થી 8 સુધીની શાળાઓમાં રજા જાહેર કરી છે.
ઉત્તરાખંડના 10 જિલ્લાઓમાં આજે વરસાદની સંભાવના છે. તેમાં ઉત્તરકાશી, રુદ્રપ્રયાગ, ચમોલી, બાગેશ્વર, નૈનીતાલ, ચંપાવત, અલ્મોડા, પૌડી, ઉધમ સિંહ નગર અને પિથોરાગઢનો સમાવેશ થાય છે. રાજ્યના બાકીના જિલ્લાઓમાં હવામાન શુષ્ક રહેવાની આગાહી છે.
હિમાચલની રાજધાની સહિત રાજ્યના મોટાભાગના વિસ્તારોમાં આજે સારો તડકો જોવા મળ્યો છે. હવામાન વિભાગ (IMD) અનુસાર, બપોર બાદથી વેસ્ટર્ન ડિસ્ટર્બન્સ સક્રિય થવા જઈ રહ્યું છે. તેની અસરને કારણે રાજ્યમાં આગામી પાંચ દિવસ વરસાદની આગાહી કરવામાં આવી છે. IMDએ 26 અને 27 સપ્ટેમ્બરે ભારે વરસાદનું યલો એલર્ટ જાહેર કર્યું છે. રાજ્યના મોટાભાગના શહેરોના તાપમાનમાં ઘટાડો થવાની સાથે સવારે, સાંજે અને રાત્રિના સમયે ઠંડી વધશે.
પંજાબના મોટાભાગના વિસ્તારોમાંથી ચોમાસું હવે વિદાય લઈ ચૂક્યું છે. 23 સપ્ટેમ્બરે ચોમાસાની વાપસી રેખા ગુરદાસપુર અને ચંદીગઢમાંથી પસાર થઈ રહી હતી. તેની સાથે જ પંજાબ અને ચંડીગઢમાં હવામાન ધીમે ધીમે શુષ્ક થવાનો તબક્કો શરૂ થઈ ગયો છે. હવામાન વિજ્ઞાન કેન્દ્ર અનુસાર, આજે હવામાન શુષ્ક રહેશે.
હરિયાણા સહિત સમગ્ર ઉત્તર ભારતમાંથી દક્ષિણ-પશ્ચિમ ચોમાસાની વિદાય પ્રક્રિયા ઝડપથી પૂર્ણ થઈ રહી છે. હવામાન વિભાગ (IMD) મુજબ, યમુનાનગર જિલ્લાના કેટલાક વિસ્તારોને છોડીને રાજ્યના લગભગ 21 જિલ્લાઓમાંથી ચોમાસું સંપૂર્ણપણે વિદાય લઈ ચૂક્યું છે. આવી જ સ્થિતિ પડોશી રાજ્યોમાં પણ છે. પંજાબના લગભગ 92% વિસ્તારો, રાજસ્થાન, ગુજરાત અને ઉત્તર પ્રદેશના વિવિધ વિસ્તારોમાંથી પણ ચોમાસું પરત ફરી ચૂક્યું છે. ચોમાસું વિદાય લેતાં જ હવે હવામાનના મિજાજમાં ફેરફાર થવા લાગ્યો છે.
બિહારમાં સમગ્ર રાજ્યમાં વાવાઝોડા સાથે વરસાદનું એલર્ટ જાહેર કરવામાં આવ્યું છે. પટણા, સમસ્તીપુર અને બેગુસરાયમાં ગુરુવારની સવારથી છૂટાછવાયા વરસાદ પડી રહ્યો છે. પટણામાં બુધવારની રાતથી જ વરસાદ શરૂ થઈ ગયો હતો.