સત્ય. સાહસ. સંકલ્પ.

અકવાન વાવાઝોડું આંધ્રપ્રદેશમાં 130 કિમી/કલાકની ઝડપે ત્રાટકશે, બંગાળની ખાડીમાં અલ-નીનોની અસર

અકવાન વાવાઝોડું આંધ્રપ્રદેશમાં 130 કિમી/કલાકની ઝડપે ત્રાટકશે, બંગાળની ખાડીમાં અલ-નીનોની અસર

બંગાળની ખાડીમાં અલ-નીનો અને ઈન્ડિયન ઓશન ડાયપોલ (IOD)ની અસરને કારણે છેલ્લા કેટલાક દિવસોમાં સતત ત્રણ ચક્રવાત સર્જાયા છે અને ત્રણેયની દિશા આંધ્રપ્રદેશના દરિયાકાંઠા તરફ છે. હવામાન વૈજ્ઞાનિકો આ ઘટનાને દુર્લભ ગણે છે. 1987માં પણ અલ-નીનોની સ્થિતિ દરમિયાન આવી જ પેટર્ન જોવા મળી હતી.

ભારતીય હવામાન વિભાગના મહાનિર્દેશક ડૉ. મૃત્યુંજય મોહાપાત્રાએ જણાવ્યું કે, અલ-નીનોની સ્થિતિમાં બંગાળની ખાડીના દક્ષિણ ભાગ અને નીચા અક્ષાંશો પર ચક્રવાત બનવા માટે અનુકૂળ પરિસ્થિતિ સર્જાય છે, જે મોટાભાગે આંધ્રપ્રદેશ અને તમિલનાડુના દરિયાકાંઠા તરફ આગળ વધે છે.

હાલમાં બંગાળની ખાડીમાં વિકસી રહેલું ત્રીજું વાવાઝોડું 'અકવાન' 19 નવેમ્બર સુધીમાં અત્યંત ગંભીર ચક્રવાતી વાવાઝોડામાં પરિવર્તિત થઈ શકે છે. 20 નવેમ્બર, 2026ના રોજ બપોરની આસપાસ તે નેલ્લોર અને તુની વચ્ચે આંધ્રપ્રદેશના તટ પર લેન્ડફોલ થવાની શક્યતા છે.

લેન્ડફોલ સમયે પવનની ગતિ 120 થી 130 કિમી પ્રતિ કલાક અને ઝાપટા 145 કિમી પ્રતિ કલાક સુધી પહોંચી શકે છે. 19 અને 20 નવેમ્બરે આંધ્રપ્રદેશના તટીય જિલ્લાઓમાં 20 થી 30 સેન્ટિમીટર સુધી અતિભારે વરસાદ પડી શકે છે અને દરિયાનું જળસ્તર 1 થી 2 મીટર સુધી ઊંચું ઉઠવાની આશંકા છે.

આ વાવાઝોડાની અસરથી દક્ષિણ ઓડિશા, પૂર્વી તેલંગાણા અને દક્ષિણ છત્તીસગઢમાં પણ ભારે વરસાદ અને 50 થી 80 કિમી પ્રતિ કલાકની ઝડપે પવન ફૂંકાઈ શકે છે. જોકે, ઉત્તર ભારત પર તેની કોઈ સીધી અસર નહીં પડે.