ઝિમ્બાબ્વેના અનુભવી બેટ્સમેન ક્રેગ ઇરવિને ઓસ્ટ્રેલિયા સામેની ODI સિરીઝની ત્રીજી મેચમાં 41 વર્ષ અને 32 દિવસની ઉંમરે અડધી સદી ફટકારીને નવો વિશ્વ રેકોર્ડ બનાવ્યો છે. આ સાથે તેઓ પૂર્ણ સભ્ય ટીમ માટે પુરુષોની ODI ક્રિકેટમાં સૌથી વધુ ઉંમરે અડધી સદી ફટકારનારા ખેલાડી બન્યા છે.
ઇરવિને 79 બોલમાં 59 રન બનાવ્યા, જેમાં 5 ચોગ્ગા સામેલ હતા. તેમણે ઝિમ્બાબ્વેની ઇનિંગને સંભાળી અને ટીમને 271 રન સુધી પહોંચાડવામાં મહત્વનું યોગદાન આપ્યું. ડાબોડી બેટ્સમેને આ ઇનિંગ સાથે અફઘાનિસ્તાનના મોહમ્મદ નબીનો રેકોર્ડ તોડ્યો. નબીએ 2025માં બાંગ્લાદેશ સામે 40 વર્ષ અને 286 દિવસની ઉંમરે અડધી સદી ફટકારી હતી.
પુરુષોની ODI ક્રિકેટમાં પૂર્ણ સભ્ય ટીમો માટે સૌથી વધુ ઉંમરે 50થી વધુ રન બનાવનારા ખેલાડીઓમાં ઇરવિન પછી બીજા સ્થાને નબી છે. ત્રીજા સ્થાને પાકિસ્તાનના પૂર્વ કેપ્ટન મિસ્બાહ-ઉલ-હક છે, જેમણે 2015માં દક્ષિણ આફ્રિકા સામે 40 વર્ષ અને 283 દિવસની ઉંમરે 50થી વધુ રન બનાવ્યા હતા. ચોથા સ્થાને ઇંગ્લેન્ડના જ્યોફ્રી બોયકોટ (1981માં ઓસ્ટ્રેલિયા સામે, 40 વર્ષ 226 દિવસ) અને પાંચમા સ્થાને વેસ્ટઇન્ડીઝના ક્લાઇવ લોયડ (1985માં શ્રીલંકા સામે, 40 વર્ષ 155 દિવસ) છે.
રસપ્રદ વાત એ છે કે આ મેચમાં ઝિમ્બાબ્વેની પ્લેઇંગ ઇલેવનમાં 40 વર્ષથી વધુ ઉંમરના ચાર ખેલાડીઓ હતા — ઇરવિન ઉપરાંત ગ્રીમ ક્રેમર, સિકંદર રઝા અને બ્રેન્ડન ટેલર. ઝિમ્બાબ્વેએ પહેલા બેટિંગ કરતા ઓસ્ટ્રેલિયા સામે 272 રનનો ટાર્ગેટ મૂક્યો હતો. ઇરવિન ઉપરાંત ઇનોસન્ટ કાયાએ 55 રન અને કેપ્ટન સિકંદર રઝાએ 81 રનની અણનમ ઇનિંગ રમી હતી. ઓસ્ટ્રેલિયા તરફથી નાથન એલિસે 3 અને સ્પેન્સર જોહ્ન્સન તથા એડમ ઝામ્પાએ 2-2 વિકેટ લીધી હતી.