લંડન મેટલ એક્સચેન્જ (LME)માં તાંબાના ભાવ નવા રેકોર્ડ સ્તરે પહોંચી ગયા છે. સોમવારે કોપરનો ભાવ 14,533 ડોલર પ્રતિ ટનના લાઈફ ટાઈમ હાઈ પર પહોંચી ગયો હતો, જ્યારે ત્રણ મહિનાના બેન્ચમાર્ક વાયદા ભાવમાં 0.9% નો વધારો થઈને તે 14,510 ડોલર પ્રતિ ટન પર કારોબાર કરી રહ્યો હતો.
આ વર્ષે અત્યાર સુધીમાં કોપરની કિંમતમાં 16% નો વધારો થયો છે, જે તમામ બ્રોકરેજના અનુમાનો કરતાં વધુ છે. ગોલ્ડમેન સૅક્સે 2026ના ચોથા ક્વાર્ટર માટે તાંબાની કિંમત 11,200 ડોલર પ્રતિ ટન રહેવાનો અંદાજ લગાવ્યો હતો, જ્યારે ડ્યુશ બેંકે એક વર્ષ માટે સરેરાશ કિંમત 12,125 ડોલર પ્રતિ ટન રહેવાની અપેક્ષા રાખી હતી.
કોપરના ભાવમાં આવેલા ઉછાળા પાછળ અનેક કારણો છે. પ્રથમ કારણ અમેરિકી રાષ્ટ્રપતિ ડોનાલ્ડ ટ્રમ્પ દ્વારા રિફાઈન્ડ કોપરની આયાત પર ટેરિફ વધારવાની આશંકા છે, જેના કારણે વેપારીઓએ મોટા પ્રમાણમાં તાંબાની આયાત કરી છે. 2026ના પ્રથમ છ મહિનામાં અમેરિકાએ લગભગ 8,85,000 ટન તાંબાની આયાત કરી છે.
બીજું કારણ સપ્લાય-ડિમાન્ડ અસંતુલન છે. જૂની ખાણો ઉત્પાદન વધારવામાં સક્ષમ નથી, જ્યારે ઘણા મુખ્ય ઉત્પાદકોને ઓપરેશનલ પડકારોનો સામનો કરવો પડી રહ્યો છે. ચિલીમાં ઓગસ્ટમાં તાંબાનું શિપમેન્ટ એક વર્ષથી વધુના નીચલા સ્તરે આવી ગયું હતું.
ત્રીજું કારણ AI ઈન્ફ્રાસ્ટ્રક્ચરનું વિસ્તરણ છે. ડેટા સેન્ટરની વીજળી પ્રણાલીથી લઈને નેટવર્ક ઉપકરણોમાં તાંબાનો ઉપયોગ વધી રહ્યો છે. રિન્યુએબલ એનર્જી અને બેટરી સ્ટોરેજમાં વૈશ્વિક રોકાણ પણ કોપરની માગને પ્રોત્સાહન આપી રહ્યું છે.
માત્ર કોપરના ભાવમાં જ નહીં, પરંતુ તેનાથી સંબંધિત કંપનીઓના શેર પણ ધૂમ મચાવી રહ્યા છે. મંગળવારે શેરબજારમાં ઘટાડા છતાં હિન્દુસ્તાન કોપરનો શેર લગભગ 5 ટકા વધ્યો હતો. વેદાંતા લિમિટેડ અને હિન્ડાલ્કો ઇન્ડસ્ટ્રીઝના શેર પણ વધારા સાથે ગ્રીન ઝોનમાં કારોબાર કરી રહ્યા છે.