એક વિમાનમાંથી ઉતરીને બીજા વિમાનમાં બેસવું, એરપોર્ટ પર યોગ્ય ગેટ સુધી પહોંચવું અને સામાન તથા સુરક્ષા તપાસની પ્રક્રિયામાંથી પસાર થવું એ ઘણીવાર ઉતાવળભર્યો અનુભવ બની જાય છે. જો બે ફ્લાઇટ વચ્ચેનો સમય (લેઓવર) ઓછો હોય, તો નાનકડો વિલંબ પણ ભારે તણાવ સર્જી શકે છે.
તેથી જ કનેક્ટિંગ ફ્લાઇટની મુસાફરી કરતી વખતે થોડી અગાઉથી તૈયારી અને આયોજન કામ લાગે છે. દરેક નાની વિગતની ચિંતા કરવાની જરૂર નથી, પણ ફ્લાઇટમાં ફેરફાર કે વિલંબ જેવી સ્થિતિ માટે થોડી તૈયારી રાખવી ફાયદાકારક રહે છે. આ છ સરળ બાબતો ધ્યાનમાં રાખીને તમે તમારી મુસાફરીને વધુ આરામદાયક અને તણાવમુક્ત બનાવી શકો છો.
1. ઇમિગ્રેશન અને સુરક્ષા તપાસ વિશે પહેલેથી માહિતી મેળવો : કેટલીક આંતરરાષ્ટ્રીય કનેક્ટિંગ ફ્લાઇટમાં તમારે ફરીથી ઇમિગ્રેશન કે સુરક્ષા તપાસની પ્રક્રિયામાંથી પસાર થવું પડી શકે છે. આ બાબતની અગાઉથી જાણ હોય તો તમે તે મુજબ ટાઇમ પ્લાન કરી શકો. મુસાફરી શરૂ કરતા પહેલાં જે એરપોર્ટ પર તમે કનેક્ટ કરવાના છો ત્યાં કઈ ટ્રાન્ઝિટ પ્રક્રિયાઓ જરૂરી છે તે જાણી લો. આનાથી છેલ્લી ઘડીની દોડધામ અને તણાવ ઘણો ઘટે છે.
2. તમારા દસ્તાવેજો તપાસી રાખો : કનેક્ટિંગ ફ્લાઇટમાં વધારાની ઇમિગ્રેશન, સુરક્ષા કે સામાનની તપાસ થઈ શકે છે. તેથી પાસપોર્ટ, બોર્ડિંગ પાસ અને બીજા જરૂરી દસ્તાવેજો એવી જગ્યાએ રાખો જ્યાંથી તે સહેલાઈથી મળી જાય. ચેક-ઇન લગેજમાં રાખવાને બદલે આ દસ્તાવેજો કેબિન બેગમાં રાખવા વધુ સારા, જેથી જરૂર પડે ત્યારે તરત કાઢી શકાય.
3. ટર્મિનલ અને ગેટની વિગતો હાથવગી રાખો : મોટા એરપોર્ટ પર એક ટર્મિનલથી બીજા ટર્મિનલ સુધી પહોંચવામાં સમય લાગી શકે છે. કેટલાક એરપોર્ટ પર શટલ બસ કે ટ્રેનનો ઉપયોગ કરવો પડે છે. એરપોર્ટ પર પહોંચતાં જ તમારી આગળની ફ્લાઇટનું ટર્મિનલ અને ગેટ નંબર તપાસી લો. આનાથી છેલ્લી ઘડીએ રસ્તો શોધવાની મુશ્કેલીથી બચી શકાય છે.
4. એરલાઇનની એપ કે DigiYatra ડાઉનલોડ કરી રાખો : તમારા ફોનમાં તમારી એરલાઇનની એપ ડાઉનલોડ કરી રાખો. તે ફ્લાઇટના સમય, ગેટમાં થયેલા ફેરફાર, વિલંબ અને બોર્ડિંગ સંબંધિત માહિતીના સતત અપડેટ આપે છે. એરપોર્ટ પર થતી દરેક જાહેરાત સાંભળવી હંમેશા શક્ય નથી હોતી, તેથી ફોન પર મળતા અપડેટ ખૂબ ઉપયોગી નીવડે છે.
5. જરૂરી વસ્તુઓ કેબિન બેગમાં રાખો : કેટલીકવાર ફ્લાઇટ મોડી પડે છે અથવા ચેક-ઇન કરેલો સામાન સમયસર ન પણ પહોંચે. આવી સ્થિતિમાં અગવડ ઓછી થાય તે માટે કેબિન બેગમાં મોબાઈલ ચાર્જર, જરૂરી દવાઓ, પાણીની બોટલ, હળવો નાસ્તો અને જરૂર પડે તો બદલવા માટે વધારાનાં કપડાં રાખો.
6. લેઓવરનો સમય અગાઉથી તપાસો : ટિકિટ બુક કરતી વખતે બે ફ્લાઇટ વચ્ચેના સમયગાળાની તપાસ કરો. આ સમય ખૂબ ઓછો હોય તો પહેલી ફ્લાઇટમાં થોડો વિલંબ થવાને કારણે પણ તમે બીજી ફ્લાઇટ ચૂકી શકો છો. બીજી બાજુ, સમય ખૂબ વધારે હોય તો એરપોર્ટ પર લાંબો સમય રાહ જોવી પડે છે. તેથી ખાતરી કરો કે આગળના ગેટ સુધી આરામથી પહોંચવા માટે ફ્લાઇટ વચ્ચે પૂરતો સમય હોય.
યોગ્ય તૈયારી સાથે કનેક્ટિંગ ફ્લાઇટની મુસાફરી ઘણી સહેલી બની જાય છે. મુસાફરી દરમિયાન ફ્લાઇટના સમય કે ગેટમાં ફેરફાર થાય તો ગભરાવાને બદલે શાંત રહો, માહિતી તપાસો અને તે મુજબ આગળનું આયોજન કરો. આ રીતે બિનજરૂરી ઉતાવળ કે તણાવ વગર તમે તમારી મુસાફરી પૂરી કરી શકશો.