ઉત્તર પ્રદેશ વિધાનસભા ચૂંટણી 2027ની તૈયારીઓ માટે દિલ્હીમાં કોંગ્રેસની મહત્વની બેઠક યોજાઈ હતી. આ બેઠકમાં પાર્ટીના નેતા રાહુલ ગાંધીએ સમાજવાદી પાર્ટી (સપા) સાથે બેઠકોની વહેંચણી સન્માનજનક રીતે થવી જોઈએ તેવું સ્પષ્ટ કર્યું હતું. તેમણે કહ્યું કે સપા કોંગ્રેસની મહત્વની સહયોગી પાર્ટી છે અને દરેકને સાથે લઈને ચાલવું પડશે.
દિલ્હીમાં યોજાયેલી આ રણનીતિક બેઠકમાં કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે, પ્રિયંકા ગાંધી, સંગઠન મહાસચિવ કે.સી. વેણુગોપાલ, ઉત્તર પ્રદેશ કોંગ્રેસ અધ્યક્ષ આરાધના મિશ્રા, સાંસદ ઈમરાન મસૂદ અને પ્રભારી રાજેન્દ્ર પાલ ગૌતમ સહિતના વરિષ્ઠ નેતાઓ ઉપસ્થિત રહ્યા હતા.
સૂત્રોના જણાવ્યા અનુસાર, સપા સાથે બેઠકોની વહેંચણી અને અન્ય ચૂંટણીલક્ષી મુદ્દાઓ પર ચર્ચા તથા સંકલન માટે કોંગ્રેસે પાંચ સભ્યોની એક ખાસ કમિટીની રચના કરી છે. આ કમિટીમાં પ્રિયંકા ગાંધી, કે.સી. વેણુગોપાલ, રાજેન્દ્ર પાલ ગૌતમ, ઈમરાન મસૂદ અને આરાધના મિશ્રાનો સમાવેશ કરવામાં આવ્યો છે. આ કમિટી સપા સાથેની વાટાઘાટો અને સંકલનની જવાબદારી સંભાળશે.
બેઠક પૂર્ણ થયા બાદ કોંગ્રેસ અધ્યક્ષ મલ્લિકાર્જુન ખડગેએ સોશિયલ મીડિયા પ્લેટફોર્મ 'એક્સ' પર પોસ્ટ કરીને જણાવ્યું કે, “ઉત્તર પ્રદેશ કોંગ્રેસ કમિટીના વરિષ્ઠ નેતાઓ સાથે રાજ્યની રાજકીય પરિસ્થિતિ અને આગામી વિધાનસભા ચૂંટણી અંગે ઊંડાણપૂર્વક ચર્ચા કરવામાં આવી છે. ઉત્તર પ્રદેશની આગામી ચૂંટણી દેશના રાજકારણને નવી દિશા આપશે. રાજ્યની જનતા પરિવર્તનની અપેક્ષા રાખી રહી છે અને સામાજિક ન્યાય, સમાન તક તેમજ વંચિત વર્ગોના અધિકારોને મજબૂત થતા જોવા માંગે છે. કોંગ્રેસ પાર્ટી INDIA ગઠબંધન સાથે મળીને ઉત્તર પ્રદેશની જનતા સમક્ષ મજબૂત વિકલ્પ રજૂ કરશે.”
કોંગ્રેસની આ બેઠક એવા સમયે યોજાઈ છે જ્યારે કોંગ્રેસ અને સમાજવાદી પાર્ટી વચ્ચે બે મુખ્ય મુદ્દાઓ પર મતભેદ ચાલી રહ્યો છે. પ્રથમ મુદ્દો બેઠકોની વહેંચણીનો છે, જ્યારે બીજો મુદ્દો સ્વામી પ્રસાદ મૌર્યને ગઠબંધનમાં સામેલ કરવાની કોંગ્રેસની કવાયતનો છે. અહેવાલો અનુસાર, તાજેતરમાં અખિલેશ યાદવે 'હિન્દુસ્તાન ટાઈમ્સ' સાથેની વાતચીતમાં દાવો કર્યો હતો કે કોંગ્રેસે રાજ્યની 403 બેઠકોમાંથી 181 બેઠકોની માંગણી કરી છે. આ ઉપરાંત, અખિલેશ યાદવે સ્વામી પ્રસાદ મૌર્યને ગઠબંધનમાં લેવાનો ઈનકાર કરી દીધો છે. ઉલ્લેખનીય છે કે મૌર્યની રાહુલ ગાંધી સાથેની મુલાકાત બાદ તેઓ ગઠબંધનમાં જોડાશે તેવી અટકળો ફેલાઈ હતી.
ઉત્તર પ્રદેશની ગત વિધાનસભા ચૂંટણીઓમાં કોંગ્રેસનું પ્રદર્શન નબળું રહ્યું છે. વર્ષ 2022ની ચૂંટણીમાં કોંગ્રેસ માત્ર 2 બેઠકો જ જીતી શકી હતી અને પાર્ટીને કુલ 2.33 ટકા મત મળ્યા હતા. તે અગાઉ 2017ની ચૂંટણીમાં કોંગ્રેસને 6.25 ટકા મત મળ્યા હતા અને પાર્ટી 7 બેઠકો પર વિજયી બની હતી.