ગુજરાત વિધાનસભા ચૂંટણી 2027 નજીક આવી રહી છે. આ ચૂંટણીમાં ભાજપને ટક્કર આપવા માટે કોંગ્રેસે વરિષ્ઠ નેતા રણદીપ સુરજેવાલાને ગુજરાત કોંગ્રેસના પ્રભારી તરીકે નિયુક્ત કર્યા છે. સુરજેવાલાએ રાજ્યમાં પક્ષની રણનીતિ નક્કી કરવા માટે ત્રણ મુખ્ય મુદ્દા રજૂ કર્યા છે.
સૂત્રોના જણાવ્યા અનુસાર, સુરજેવાલાએ ગુજરાતના નેતાઓ સાથેની પ્રથમ બેઠકમાં આ રણનીતિ ઘડી છે. પ્રથમ મુદ્દો એ છે કે ચૂંટણી દરમિયાન રાષ્ટ્રીય મુદ્દાઓને બદલે સ્થાનિક અને રાજ્ય-વિશિષ્ટ મુદ્દાઓને પ્રાથમિકતા આપવી. બીજો મુદ્દો એ છે કે વડાપ્રધાન નરેન્દ્ર મોદી અને કેન્દ્રીય ગૃહપ્રધાન અમિત શાહ પર સીધા પ્રહારો ટાળવા. તેના બદલે, હુમલો રાજ્યના ધારાસભ્યો, મંત્રીઓ અને મુખ્યમંત્રી પર કેન્દ્રિત રહેશે. ત્રીજો મુદ્દો એ છે કે પ્રચાર દરમિયાન અદાણી કે અંબાણીને નામ લઈને નિશાન બનાવવાનું ટાળવું. પક્ષ માને છે કે ગુજરાતી સમાજ વ્યવસાયને મહત્વ આપે છે અને આ બંને ઉદ્યોગપતિઓ રાજ્યના ગર્વ છે.
રણદીપ સુરજેવાલાએ અગાઉ 2017ની ગુજરાત વિધાનસભા ચૂંટણીમાં મહત્વની ભૂમિકા ભજવી હતી, જ્યારે કોંગ્રેસે ભાજપને જોરદાર ટક્કર આપી હતી. તેમને સપ્ટેમ્બર 2020માં કર્ણાટક કોંગ્રેસના પ્રભારી મહાસચિવ તરીકે નિયુક્ત કરવામાં આવ્યા હતા. ત્યારબાદ 2023ની ચૂંટણીમાં કોંગ્રેસે કર્ણાટકમાં જંગી જીત મેળવી હતી. આ સફળતાને ધ્યાનમાં રાખીને કોંગ્રેસ અધ્યક્ષ મલ્લિકાર્જુન ખડગે અને લોકસભામાં વિરોધ પક્ષના નેતા રાહુલ ગાંધીએ તેમને ગુજરાતની જવાબદારી સોંપી છે.
ઉલ્લેખનીય છે કે, 2024ની લોકસભા ચૂંટણીમાં ભાજપને પ્રચંડ બહુમતી ન મળતાં કોંગ્રેસમાં આત્મવિશ્વાસ વધ્યો છે. જુલાઈ 2024માં એક કાર્યક્રમમાં રાહુલ ગાંધીએ કહ્યું હતું કે ‘INDIA’ ગઠબંધન અયોધ્યામાં ભાજપને હરાવવામાં સફળ રહ્યું છે અને આગામી ચૂંટણીમાં ગુજરાતમાં પણ ભાજપને સમાન સ્થિતિનો સામનો કરવો પડશે. આમ, ગુજરાતમાં ભાજપના ગઢને ભેદવા માટે કોંગ્રેસ હવે કર્ણાટક પેટર્ન અજમાવવાની તૈયારીમાં છે.