મુખ્યમંત્રી ભૂપેન્દ્ર પટેલે દાહોદ જિલ્લાના ગરબાડા ખાતે ધરતી આબા ભગવાન બિરસા મુંડાની પ્રતિમાને પુષ્પાંજલિ અર્પણ કરીને તેમના ત્રણ દિવસીય પ્રવાસની શરૂઆત કરી છે. આ પ્રસંગે તેમણે સ્થાનિક લોકો અને બાળકો સાથે આત્મીયતાથી વાતચીત કરી હતી. ગરબાડાના આદિવાસી ગ્રામજનોએ તેમનું પરંપરાગત આદિવાસી કોટી અને તીર-કામઠાથી સ્વાગત કર્યું હતું. લોકોએ તેમને 'ભૂપેન્દ્ર દાદા' તરીકે બિરદાવ્યા હતા.
મુખ્યમંત્રીએ ગરબાડાથી ગાંગરડી ગામે જવા રવાના થતાં માર્ગમાં મુકેશ બારીયાના ઘરે જઈને ચાનો આસ્વાદ માણ્યો હતો અને પરિવારજનો સાથે વાતચીત કરી હતી. આ પ્રવાસ દરમિયાન તેઓ આદિવાસી પરિવારોના ઘરે ભોજન કરશે અને રાત્રિ રોકાણ પણ કરશે. ઉપરાંત ખાટલા બેઠકનું આયોજન પણ કરાશે.
18થી 20 નવેમ્બર દરમિયાન ચાલતા આ પ્રવાસમાં મુખ્યમંત્રી બાબા ધોડાજા દેવ મંદિરની મુલાકાત લેશે, ધાનપુર તાલુકામાં વિકાસકામોની સમીક્ષા કરશે અને 20 નવેમ્બરે દાહોદ સ્માર્ટ સિટીની સરકારી લાઇબ્રેરીમાં બાળકો અને યુવાનો સાથે સંવાદ કરશે.
આ પ્રવાસને ચૂંટણી પહેલાની રાજકીય સક્રિયતા તરીકે જોવામાં આવી રહ્યો છે. 2027ની વિધાનસભા ચૂંટણીમાં હવે એક વર્ષથી પણ ઓછો સમય બાકી છે. 12 ઓક્ટોબરે ભાજપના પ્રદેશ નેતૃત્વે તમામ મંત્રીઓને આદિવાસી બહુમતી ધરાવતા વિસ્તારોમાં ઓછામાં ઓછા 72 કલાક રોકાવા સૂચના આપી હતી. ચાર મંત્રીઓએ આ કામગીરી શરૂ કરી દીધી છે.
રાજકીય વિશ્લેષકોના મતે આ નિર્ણય પાછળ નર્મદા જિલ્લા પંચાયતની ચૂંટણીમાં ભાજપને મળેલો ફટકો, આમ આદમી પાર્ટીનો વધતો પ્રભાવ અને આદિવાસીઓના જમીન-જંગલના અધિકારો સંબંધિત અસંતોષ મુખ્ય કારણો હોઈ શકે છે. ભાજપ હવે માત્ર ચૂંટણી સમયે જ નહીં, પરંતુ અત્યારથી જ આદિવાસી વિસ્તારોમાં સંગઠન મજબૂત કરવા માગે છે.
ઉલ્લેખનીય છે કે 2022ની ચૂંટણીમાં ભાજપે 27 અનુસૂચિત જનજાતિ બેઠકોમાંથી 23 જીતી હતી, જ્યારે કોંગ્રેસને 3 અને આમ આદમી પાર્ટીને 1 બેઠક મળી હતી. 2017માં કોંગ્રેસે 17, BTPએ 2 અને ભાજપે 8 બેઠકો જીતી હતી. હાલ વિધાનસભામાં ભાજપ પાસે 162, કોંગ્રેસ પાસે 12, AAP પાસે 5, અપક્ષ 2 અને સમાજવાદી પાર્ટી પાસે 1 બેઠક છે.