દિલ્હીના જંતર-મંતર પર પરવાનગી વિના પ્રવેશ કરવા અને વિરોધ પ્રદર્શન કરવાના આરોપસર ધરપકડ કરાયેલા કોકરોચ જનતા પાર્ટી (CJP)ના બે પ્રવક્તા આશુતોષ રંકા અને સૌરવ દાસને કોર્ટમાંથી રાહત મળી નથી. કોર્ટે બંનેની ન્યાયિક કસ્ટડીમાં વધુ બે દિવસનો વધારો કર્યો છે.
બંનેને કડક સુરક્ષા વચ્ચે સ્પેશિયલ એક્ઝિક્યુટિવ મેજિસ્ટ્રેટ (SEM) સમક્ષ રજૂ કરવામાં આવ્યા હતા. જામીન ન મળતાં તેમને ફરી તિહાર જેલમાં મોકલી દેવાયા છે. કેસની આગામી સુનાવણી 21 ઓક્ટોબરે થશે.
આ કેસની શરૂઆત 13 ઓક્ટોબર, 2026ના રોજ થઈ હતી, જ્યારે દિલ્હી પોલીસે બંને નેતાઓની અટકાયત કરી હતી. જંતર-મંતર જેવા પ્રતિબંધિત વિસ્તારમાં મંજૂરી વિના પ્રવેશ કરવાના આરોપસર 14 ઓક્ટોબરે તેમને મેજિસ્ટ્રેટ સમક્ષ રજૂ કરાયા હતા, જ્યાંથી તેમને પાંચ દિવસ માટે તિહાર જેલમાં મોકલવામાં આવ્યા હતા.
મંદિર માર્ગ પોલીસ સ્ટેશનમાં યોજાયેલી આ કાર્યવાહીમાં અગાઉ કસ્ટડી લંબાવવાનું મુખ્ય કારણ એ હતું કે ધરપકડના દિવસે તેમના જામીન બોન્ડમેન કોર્ટમાં હાજર રહી શક્યા ન હતા. હવે CJPની કાનૂની ટીમે મેજિસ્ટ્રેટ સમક્ષ જરૂરી જામીન દસ્તાવેજો અને જામીનની રકમ રજૂ કરી દીધી છે, તેમ છતાં તેમને તાત્કાલિક મુક્તિ મળી નથી. પાર્ટીની કાનૂની ટીમે તેમની મુક્તિ માટે કોર્ટમાં દલીલો કરી હતી. આમ છતાં કોર્ટે હાલ પૂરતી કસ્ટડીમાં બે દિવસનો વધારો કરવાનો ચુકાદો આપ્યો છે. બંને નેતાઓને બુધવારે ફરી કોર્ટમાં રજૂ કરવામાં આવશે.
આ ઘટનાક્રમ પર કોકરોચ જનતા પાર્ટીએ આક્રમક વલણ અપનાવ્યું છે. પાર્ટીનો દાવો છે કે સૌરવ અને આશુતોષ ત્યાં કોઈ ગેરકાનૂની કામ કરવા નહીં, પરંતુ માત્ર રાષ્ટ્રધ્વજ ફરકાવવા અને સૂત્રોચ્ચાર કરવા ગયા હતા. પાર્ટીનો આક્ષેપ છે કે દિલ્હી પોલીસ અને વહીવટીતંત્ર કોર્ટની સુનાવણીમાં જાણી જોઈને વિલંબ કરી રહ્યું છે.
પાર્ટીના નેતા અભિજીત દિપકે જણાવ્યું કે વહીવટીતંત્ર પાસે તેમના નેતાઓને જેલમાં રાખવા માટે કોઈ નક્કર કાનૂની કારણ બચ્યું નથી. તેમણે ઉમેર્યું કે કાનૂની કારણોના અભાવે જ અધિકારીઓ આવી યુક્તિઓનો આશરો લઈ રહ્યા છે. CJPના કાનૂની વડા રત્ના સિંહે પણ આરોપ લગાવ્યો છે કે બપોરની સુનાવણી પોલીસ દ્વારા જાણી જોઈને કલાકો સુધી મોડી કરવામાં આવી હતી.
કોર્ટે કસ્ટડી લંબાવતાં CJPના સ્થાપક અભિજીત દિપક ભાવુક થઈ ગયા હતા. તેમણે સોશિયલ મીડિયા પર સાથીઓ માટે લાંબો સંદેશ પોસ્ટ કર્યો હતો. તેમણે લખ્યું કે, "આજે જેલમાં તમારો છઠ્ઠો દિવસ છે. હું શબ્દોમાં વર્ણવી શકતો નથી કે હું તમને બંનેને કેટલા યાદ કરી રહ્યો છું. છેલ્લા ત્રણ મહિનાથી મને તમારા ફોન કોલ્સ અને મેસેજની આદત પડી ગઈ હતી." તેમણે ઉમેર્યું કે, "તમારા મેસેજ દિવસ-રાત આવતા રહેતા હતા. હું તેમાંથી મોટાભાગનાને અવગણતો, કારણ કે મને ખબર હતી કે તમે મારા વિના પણ તમારું કામ સારી રીતે સંભાળી લેશો, અને તમે હંમેશા એવું જ કર્યું છે."
નોંધનીય છે કે ધરપકડના દિવસે જામીન બોન્ડમેન કોર્ટમાં હાજર ન હોવાથી તેમને મુક્તિ મળી શકી ન હતી. કાનૂની દસ્તાવેજો રજૂ કર્યા પછી પણ કોર્ટે તેમની કસ્ટડી લંબાવી છે.