નવી દિલ્હીમાં મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ સાથે કોકરોચ જનતા પાર્ટી (CJP)નું આંદોલન વધુ ઉગ્ર બન્યું છે. પાર્ટીના મુખ્ય નેતાઓની અટકાયત બાદ હવે પાર્ટીના રાષ્ટ્રીય સંગઠન પ્રભારી અજિંક્ય શિંદેએ આંદોલનની કમાન સંભાળી છે.
શિંદેએ સોશિયલ મીડિયા પર વીડિયો જાહેર કરીને રવિવારે (11 ઓક્ટોબર) સવારે 10 વાગ્યે ફરી જંતર-મંતર તરફ કૂચ કરવાનું એલાન કર્યું છે. તેમણે કાર્યકર્તાઓને અપીલ કરી કે, “જો દિલ્હી પોલીસ રસ્તામાં રોકે, તો ત્યાં જ ઊભા રહીને વિરોધ પ્રદર્શન કરો.”
શિંદેએ કેન્દ્ર સરકાર પર આરોપ લગાવતા કહ્યું કે પોલીસ કાર્યવાહી સરકારના ડરને દર્શાવે છે. તેમણે સ્પષ્ટ કર્યું કે જ્યાં સુધી CEC જ્ઞાનેશ કુમાર રાજીનામું નહીં આપે, ત્યાં સુધી આંદોલન ચાલુ રહેશે.
ઉલ્લેખનીય છે કે શનિવારે થયેલા પ્રદર્શન દરમિયાન CJPએ દાવો કર્યો હતો કે દિલ્હીમાં 15,000થી વધુ વિદ્યાર્થીઓ અને કાર્યકર્તાઓની અટકાયત કરવામાં આવી છે. જોકે, આ આંકડાની સ્વતંત્ર રીતે પુષ્ટિ થઈ શકી નથી.
આ વિવાદ વચ્ચે કોંગ્રેસના નેતા રાહુલ ગાંધીએ પણ CJPના સમર્થનમાં મેદાનમાં ઉતરવાની જાહેરાત કરી છે. કોંગ્રેસના અન્ય નેતાઓ અને ધારાસભ્યોને પણ દિલ્હી બોલાવવામાં આવ્યા છે.
દિલ્હી પોલીસે જણાવ્યું છે કે પ્રદર્શનકારીઓએ શાંતિપૂર્ણ માહોલ જાળવવાનું વચન તોડ્યું છે. કાયદો અને વ્યવસ્થા જાળવવા માટે નવી દિલ્હી અને મધ્ય દિલ્હીમાં ભારે પોલીસ બંદોબસ્ત ગોઠવવામાં આવ્યો છે. આજે સવારથી 30 મુખ્ય સ્થળોએ ટ્રાફિક રૂટ બદલવામાં આવ્યા છે.
ટ્રાફિક પોલીસે રેલવે સ્ટેશન, બસ ટર્મિનલ અને એરપોર્ટ તરફ જતા મુસાફરોને વધારાનો સમય લઈને નીકળવા અને બિનજરૂરી યાત્રા ટાળવા અપીલ કરી છે.