મુખ્ય ચૂંટણી કમિશનર જ્ઞાનેશ કુમાર સામે 10 ઓક્ટોબરે દિલ્હીના જંતર-મંતર પર યોજાનારા વિરોધ પ્રદર્શન પહેલાં રાજકીય માહોલ ગરમ બન્યો છે. કોકરોચ જનતા પાર્ટી (CJP)એ દાવો કર્યો છે કે ઉત્તર પ્રદેશ, મહારાષ્ટ્ર અને પશ્ચિમ બંગાળમાં તેમના હજારો કાર્યકરો અને સ્વયંસેવકોને પોલીસે અટકાયતમાં લીધા છે.
CJPના સહ-સંયોજક આશુતોષ રાંકાએ સોશિયલ મીડિયા પર વીડિયો શેર કરીને આ દાવો કર્યો છે. તેમણે કહ્યું કે જે સ્વયંસેવકો 10 ઓક્ટોબરના પ્રદર્શનમાં જોડાવાની તૈયારી કરી રહ્યા હતા, તેમને પકડવામાં આવી રહ્યા છે. તેમણે પોલીસ પર વ્યંગ કરતાં પૂછ્યું, “પોલીસ કેટલા લોકોને પકડશે? દેશમાં અઢી કરોડ કોકરોચ છે.”
રાંકાએ કોલકાતાની એક ઘટનાનો ઉલ્લેખ કરતાં દાવો કર્યો કે અબ્દુલ અને તેની ટીમને સાદા કપડાંમાં આવેલા લોકોએ ઉઠાવી લીધા છે અને અજ્ઞાત સ્થળે લઈ ગયા છે. ગુરુવારે બેંગલુરુમાં પણ એક વિરોધ કાર્યક્રમનું આયોજન કરવામાં આવ્યું હતું.
આંદોલન સાથે જોડાયેલા અન્ય નેતા સૌરભ દાસે અગાઉ આશંકા વ્યક્ત કરી હતી કે 10 ઓક્ટોબર પહેલા પોલીસ તેમને અને અન્ય નેતાઓને કસ્ટડીમાં લઈ શકે છે. તેમણે સ્પષ્ટ કર્યું કે ચૂંટણી કમિશનરના રાજીનામાની આ લડાઈ લાંબી ચાલી શકે છે. ભલે ગમે તેટલા લોકોને કસ્ટડીમાં લેવામાં આવે, પરંતુ મતદાન કરવાનો અધિકાર સુરક્ષિત રાખવો હોય તો આ ભ્રષ્ટ સિસ્ટમ સામેની લડાઈ ચાલુ રાખવી પડશે.