જમ્મુ-કાશ્મીરના કઠુઆ જિલ્લામાં આવેલા બસોહલી કેમ્પમાં સેન્ટ્રલ ઇન્ડસ્ટ્રિયલ સિક્યોરિટી ફોર્સ (CISF)ના એક જવાને પોતાના સાથીઓ પર ગોળીબાર કર્યો, જેમાં ચાર જવાનોના મોત થયા છે. મૃતકોમાં એક આસિસ્ટન્ટ કમાન્ડન્ટનો પણ સમાવેશ થાય છે.
મૃતકોની ઓળખ આસિસ્ટન્ટ કમાન્ડન્ટ અંકિત કુમાર પાંડે, સબ-ઇન્સ્પેક્ટર લક્ષ્મણ સિંહ, કોન્સ્ટેબલ રફીક અહમદ અને કોન્સ્ટેબલ સંદીપ કુમાર તરીકે થઈ છે. આ જવાનો હિમાચલ પ્રદેશની સરહદને અડીને આવેલા બસોહલીના મશકા ગામમાં સેવા-III પાવર પ્રોજેક્ટની સુરક્ષામાં તૈનાત હતા.
પ્રાથમિક માહિતી અનુસાર, કોઈ વાતને લઈને બે જવાનો વચ્ચે વિવાદ થયો હતો. આ દરમિયાન તેમાંથી એક જવાને અંધાધૂંધ ફાયરિંગ કરી દીધું હતું. ઘટનાની જાણ થતાં જ કઠુઆ પોલીસે આરોપી જવાનની ધરપકડ કરી લીધી છે. CISFના વરિષ્ઠ અધિકારીઓ પણ ઘટનાસ્થળે પહોંચી ગયા છે અને તપાસ શરૂ કરી છે.
ઉલ્લેખનીય છે કે, છેલ્લા પાંચ વર્ષમાં આ પ્રકારની અંદરો-અંદરની ઘટનાઓમાં 24 જવાનોના મોત થયા છે. આ ઘટના સુરક્ષા દળોમાં માનસિક તણાવ અને વિવાદોને લઈને ગંભીર ચિંતા ઊભી કરે છે.
સમાચાર અપડેટ થઈ રહ્યા છે.