ઓસ્ટ્રેલિયન ક્રિકેટર ક્રિસ લિનને કોકેઇનના ઉપયોગના મામલે આપવામાં આવેલી સજા ત્રણ મહિનાથી ઘટાડીને એક મહિનો કરવામાં આવી છે. ઇંગ્લેન્ડના ક્રિકેટ નિયમનકાર (રેગ્યુલેટર)એ શુક્રવારે આ વાતની પુષ્ટિ કરી છે. સજાનો એક મહિનાનો સમયગાળો પૂરો થઈ ગયો હોવાથી હવે લિન રમવા માટે મુક્ત છે.
36 વર્ષીય લિન 18 જુલાઈના રોજ ઇંગ્લેન્ડમાં T20 બ્લાસ્ટની ફાઇનલ ડે દરમિયાન લેવાયેલા એન્ટિ-ડોપિંગ ટેસ્ટમાં પોઝિટિવ આવ્યો હતો. તે સમયે તે નોર્થમ્પ્ટનશાયર વતી રમી રહ્યો હતો.
લિનના યુરિનનો નમૂનો ફ્રાન્સની વાડા (WADA) દ્વારા માન્યતા પ્રાપ્ત લેબોરેટરીમાં મોકલવામાં આવ્યો હતો. તપાસમાં કોકેઇનનું મેટાબોલાઇટ બેન્ઝોયલેકગોનિન ઓછી માત્રામાં મળી આવ્યું હતું. ત્યાર બાદ લિને એન્ટિ-ડોપિંગ નિયમોના ઉલ્લંઘનની વાત સ્વીકારી લીધી હતી.
ક્રિકેટ નિયમનકાર મુજબ, વાડાની 2026ની પ્રતિબંધિત પદાર્થોની યાદીમાં કોકેઇનને 'સ્ટિમ્યુલન્ટ' અને 'સબ્સ્ટન્સ ઑફ એબ્યુઝ'ની કેટેગરીમાં રાખવામાં આવ્યું છે. આ પદાર્થ સ્પર્ધા દરમિયાન પ્રતિબંધિત છે.
તપાસમાં એવું માનવામાં આવ્યું કે લિને તેનો ઉપયોગ સ્પર્ધાની બહાર કર્યો હતો અને તેનો તેના રમતગમતના પ્રદર્શન સાથે કોઈ સંબંધ નહોતો. તેણે રિહેબ (પુનર્વસન) કાર્યક્રમ પણ પૂરો કર્યો હતો. આ પરિસ્થિતિઓને ધ્યાનમાં રાખીને તેની સજા ત્રણ મહિનાથી ઘટાડીને એક મહિનો કરવામાં આવી.
ક્રિકેટ નિયમનકારે જણાવ્યું કે લિને એક મહિનાનું સસ્પેન્શન પૂરું કરી લીધું છે. ઓસ્ટ્રેલિયન મીડિયા અહેવાલો અનુસાર, તે આગામી સીઝનમાં બિગ બેશ લીગ (BBL)માં મેલબર્ન રેનેગેડ્સ વતી રમી શકે છે. પ્રતિબંધનો સમયગાળો પૂરો થયા બાદ તેના BBLમાં રમવા પર કોઈ રોક નથી.
ક્રિસ લિન BBLના ઇતિહાસમાં સૌથી વધુ રન બનાવનાર બેટર છે. તેણે ઓસ્ટ્રેલિયા વતી 18 T20 આંતરરાષ્ટ્રીય અને 4 વન-ડે મેચ રમી છે. તે દુનિયાભરની T20 લીગમાં પોતાની આક્રમક બેટિંગ માટે જાણીતો છે.