ભારતમાં બાળકોમાં થતા કેન્સરને લઈને એક મહત્વપૂર્ણ અભ્યાસ બ્રિટિશ રિસર્ચ જર્નલ 'જર્નલ ઓફ કેન્સર પોલિસી'માં પ્રકાશિત થયો છે. આ અભ્યાસમાં દેશના વિવિધ રાજ્યોમાં બાળ કેન્સરના કેસોના વિતરણ અને દર્દીઓને સારવાર માટે પડતી મુશ્કેલીઓ પર પ્રકાશ પાડવામાં આવ્યો છે.
નવી દિલ્હીની AIIMS સહિત દેશના અગ્રણી કેન્સર નિષ્ણાતોએ આ અભ્યાસ હાથ ધર્યો છે. તેમાં દેશભરમાંથી 22,000થી વધુ બાળ દર્દીઓના ડેટાનું વિશ્લેષણ કરવામાં આવ્યું છે.
અભ્યાસ મુજબ, સૌથી વધુ કેસ ઉત્તર પ્રદેશમાં નોંધાયા છે. ત્યાં 5,057 કેસ, એટલે કે કુલ કેસોના 22.6 ટકા, નોંધાયા છે. બીજા ક્રમે દિલ્હી છે, જ્યાં 19.2 ટકા કેસ છે. તમિલનાડુમાં 4,010 કેસ (18 ટકા) સાથે ત્રીજું સ્થાન છે, જ્યારે આંધ્ર પ્રદેશમાં 1,354 કેસ (6.1 ટકા) નોંધાયા છે. આ ઉપરાંત પશ્ચિમ બંગાળ, મધ્યપ્રદેશ અને બિહારમાં પણ નોંધપાત્ર સંખ્યામાં કેસ જોવા મળ્યા છે.
અભ્યાસમાં માત્ર આંકડા જ નહીં, પરંતુ દર્દીઓ અને તેમના પરિવારોને સારવાર માટે કરવી પડતી મુસાફરી અને આર્થિક બોજ પર પણ ધ્યાન દોરવામાં આવ્યું છે. દેશમાં બાળ કેન્સરની હોસ્પિટલો અસમાન રીતે વહેંચાયેલી છે, જેના કારણે ગ્રામીણ અને પછાત વિસ્તારોના પરિવારોએ લાંબી મુસાફરી કરવી પડે છે.
રિપોર્ટ મુજબ, આવા પરિવારોને હોસ્પિટલ પહોંચવા માટે સરેરાશ 2 થી 3 કલાકની મુસાફરી કરવી પડે છે. 60 ટકાથી વધુ પરિવારોને દરેક થેરાપી કે તપાસ માટે મોટા શહેરોમાં જવું પડે છે. બ્લડ કેન્સર કરતાં સોલિડ ગાંઠ ધરાવતા બાળકોને સર્જરી માટે વધુ લાંબું અંતર કાપવું પડે છે.
વારંવારની મુસાફરી અને આર્થિક મુશ્કેલીઓને કારણે ઘણા ગરીબ પરિવારો સારવાર અધવચ્ચે છોડી દે છે, જે ચિંતાનો વિષય છે.
અભ્યાસમાં સામેલ AIIMS દિલ્હી, AIIMS કલ્યાણી અને ચેન્નાઈ કેન્સર ઇન્સ્ટિટ્યૂટના નિષ્ણાતોએ સરકારને મહત્વની ભલામણો કરી છે. તેમણે જણાવ્યું છે કે માત્ર મોટા શહેરોમાં જ નહીં, પરંતુ પ્રાદેશિક અને જિલ્લા સ્તરે પણ બાળ કેન્સર સંભાળ સુવિધાઓ વિકસાવવી જોઈએ. સાથે જ રેફરલ સિસ્ટમમાં સુધારો કરીને કેન્સરની વહેલી તપાસ અને સમયસર સારવાર સુનિશ્ચિત કરવી જોઈએ, જેથી બાળકોના જીવ બચાવી શકાય.