છોટાઉદેપુર જિલ્લો કલા અને કૌશલ્યની દૃષ્ટિએ સમૃદ્ધ છે. અહીંના કલાકારો વાંસ અને વણાટમાંથી ઘરવપરાશની અને સુશોભનની અનેક વસ્તુઓ બનાવે છે. જેમાં ટોપલો, ટોપલી, સૂપડું, સાવરણી અને મસોટીનો સમાવેશ થાય છે. આ કલાકૃતિઓ માત્ર સ્થાનિક બજારમાં જ નહીં, પરંતુ દેશ-વિદેશમાં પણ લોકપ્રિય બની છે.
કલાકારો જણાવે છે કે વાંસમાંથી બનતી મસોટીમાં અનાજ વર્ષો સુધી સુરક્ષિત રીતે સંગ્રહિત કરી શકાય છે. કેમિકલનો ઉપયોગ ન થતો હોવાથી અને ઠંડક જળવાઈ રહેતી હોવાથી અનાજ બગડતું નથી. તેથી હવે શહેરી વિસ્તારોમાં પણ મસોટીની માંગ વધી છે. ઈકો-ફ્રેન્ડલી અને ટકાઉ હોવાને કારણે તેની બોલબાલા વધી રહી છે.
આ કલા માત્ર રોજગારનું સાધન નથી, પરંતુ છોટાઉદેપુરની સંસ્કૃતિનું ગૌરવ છે. સ્થાનિક કલાકારોનું માનવું છે કે સરકાર અને સમાજે આવા કલાકારોને પ્રોત્સાહન આપી આ કલાકૃતિને વધુ વેગવંતી બનાવવા આગળ આવવું જોઈએ.