છત્તીસગઢના મનેન્દ્રગઢ-કેલ્હારી માર્ગ પર પહાડહંસવાહી નજીક એક પેસેન્જર બસ ઝાડ સાથે અથડાતા ગંભીર અકસ્માત સર્જાયો હતો. આ દુર્ઘટનામાં 6 મુસાફરોના મોત થયા છે, જ્યારે 15 લોકો ગંભીર રીતે ઘાયલ થયા છે. ઘાયલોને તાત્કાલિક મનેન્દ્રગઢની હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે.
અકસ્માતની જાણ થતાં જ સ્થાનિક લોકો અને પોલીસ-આરોગ્ય વિભાગની ટીમોએ ઘટનાસ્થળે પહોંચીને બચાવ કાર્ય શરૂ કર્યું હતું. એમ્બ્યુલન્સ દ્વારા તમામ ઘાયલોને હોસ્પિટલ પહોંચાડવામાં આવ્યા હતા. પ્રારંભિક માહિતી મુજબ, અકસ્માત બાદ તરત જ બસ ડ્રાઇવર સહિત બે લોકોના ઘટનાસ્થળે જ મોત થયા હતા, બાદમાં મૃત્યુઆંક વધીને છ પર પહોંચ્યો હતો.
ઘટનાની ગંભીરતાને ધ્યાનમાં રાખીને સબ-ડિવિઝનલ મેજિસ્ટ્રેટ (SDM) શશિશેખર મિશ્રાએ હોસ્પિટલની મુલાકાત લઈને ઈજાગ્રસ્તોની સ્થિતિની સમીક્ષા કરી હતી અને તબીબોને યોગ્ય સારવારના નિર્દેશ આપ્યા હતા. પોલીસ અધીક્ષક (SP) રત્ના સિંહે પણ કેલ્હારી હોસ્પિટલમાં પહોંચીને ઘટનાની વિગતો મેળવી હતી અને રાહત કાર્યોનું નિરીક્ષણ કર્યું હતું.
અકસ્માતના સમાચાર મળતાં જ પૂર્વ ધારાસભ્ય ગુલાબ કમરો કાર્યકરો સાથે હોસ્પિટલ પહોંચ્યા હતા અને ડોક્ટરો સાથે ચર્ચા કરીને ઘાયલોની સારવારની સ્થિતિ જાણી હતી. સ્થાનિક વહીવટીતંત્ર અને આરોગ્ય વિભાગ ઘટના પર સતત નજર રાખી રહ્યા છે અને ઘાયલોને તાત્કાલિક સારવાર મળે તે સુનિશ્ચિત કરી રહ્યા છે.