નગીનાના સાંસદ અને આઝાદ સમાજ પાર્ટી (કાંશીરામ)ના અધ્યક્ષ ચંદ્રશેખર આઝાદ માટે મોટા ઝટકારૂપ બનાવ છે. ગાઝિયાબાદની વિશેષ એમપી-એમએલએ કોર્ટે 2018ના એક કેસમાં સતત ગેરહાજર રહેવા બદલ 17 નવેમ્બરે તેમના ઘરની જપ્તી કરવાનો આદેશ આપ્યો છે.
આ કેસ ગાઝિયાબાદના સાહિબાબાદ વિસ્તારમાં આવેલા વૃંદાવન ગાર્ડનમાં એક લગ્ન સમારોહ દરમિયાન થયેલી મારપીટ અને ગાળાગાળી સાથે જોડાયેલો છે. ફરિયાદી ધર્મેન્દ્ર કુમારનો આરોપ છે કે ચંદ્રશેખર આઝાદ અને તેમના સાથીઓએ તેમની સાથે ગાળાગાળી કરીને મારપીટ કરી હતી અને જાનથી મારી નાખવાની ધમકી આપી હતી.
આ પહેલાં કોર્ટે ચંદ્રશેખર આઝાદ સામે બિનજામીનપાત્ર વોરંટ જાહેર કર્યું હતું અને 17 નવેમ્બરે આરોપો ઘડવા માટે હાજર રહેવા નિર્દેશ આપ્યો હતો. જોકે, તેઓ ફરી ગેરહાજર રહ્યા હતા. તેમના વકીલે હાજરી માફીની અરજી રજૂ કરી હતી, તેમ છતાં કોર્ટે કડક વલણ અપનાવીને જપ્તીનો આદેશ આપ્યો હતો.
મળતી માહિતી મુજબ, ચંદ્રશેખર આઝાદ મુંબઈમાં સંસદીય કાર્યસમિતિની પૂર્વનિર્ધારિત બેઠકમાં વ્યસ્ત હોવાને કારણે કોર્ટમાં હાજર રહી શક્યા ન હતા. આ મામલે આગામી સુનાવણી 8 ડિસેમ્બરના રોજ થશે. કોર્ટના આદેશ અંગે ચંદ્રશેખર આઝાદ તરફથી હજુ સુધી કોઈ સત્તાવાર પ્રતિક્રિયા આવી નથી.
આ કાયદાકીય ઝટકો એવા સમયે લાગ્યો છે જ્યારે ચંદ્રશેખર આઝાદ ઉત્તર પ્રદેશ વિધાનસભા ચૂંટણીની તૈયારીઓમાં પૂરજોશમાં વ્યસ્ત છે. તાજેતરમાં તેમની પાર્ટીએ અસદુદ્દીન ઓવૈસીની પાર્ટી AIMIM સાથે મળીને 'સામાજિક પરિવર્તન મોરચો' બનાવવાની જાહેરાત કરી છે, જેમાં ચંદ્રશેખર આઝાદને મુખ્યમંત્રી પદના ચહેરા તરીકે જાહેર કરાયા છે. આ મોરચાએ રાજ્યની તમામ 403 બેઠકો પર ચૂંટણી લડવાનું એલાન કર્યું છે અને 26 નવેમ્બરે સંવિધાન દિવસ નિમિત્તે લખનૌમાં મહારેલી યોજીને ચૂંટણી ઢંઢેરો જાહેર કરવાની યોજના બનાવી છે.