કેન્દ્ર સરકારે નાણાકીય વર્ષ 2025-26 માટે કેન્દ્રીય કર્મચારીઓને 30 દિવસનું 'નોન-પ્રોડક્ટિવિટી લિંક્ડ' (એડ-હોક) બોનસ આપવાની મંજૂરી આપી છે. નાણા મંત્રાલય હેઠળના ખર્ચ વિભાગે 15 ઓક્ટોબર 2026ના રોજ એક ઓફિસ મેમોરેન્ડમ બહાર પાડીને આ બોનસ માટે રાષ્ટ્રપતિની મંજૂરીની જાણકારી આપી છે.
બોનસની ગણતરી 7,000 રૂપિયાની માસિક પગાર સીમાના આધારે કરવામાં આવે છે. એટલે કે જે કર્મચારીનો સરેરાશ માસિક પગાર આ સીમા જેટલો કે તેથી વધુ છે, તેને 30 દિવસ માટે મહત્તમ 6,908 રૂપિયાનું બોનસ મળશે. જે કર્મચારીઓનો સરેરાશ માસિક પગાર 7,000 રૂપિયાથી ઓછો છે, તેમને મળવાપાત્ર બોનસની રકમ પણ તે પ્રમાણે ઓછી હશે.
કોને મળશે આ બોનસ?
સરકારે પોતાના કર્મચારીઓને દરજ્જા મુજબ ગ્રુપ A, B, C અને Dમાં વહેંચ્યા છે. ગ્રુપ Cમાં સામાન્ય રીતે ક્લાર્ક, હેડ ક્લાર્ક, ટાઇપિસ્ટ, આસિસ્ટન્ટ અને મલ્ટી-ટાસ્કિંગ સ્ટાફ આવે છે, જેમને આ બોનસ સંપૂર્ણ મળશે.
ગ્રુપ Bના કર્મચારીઓને બે ભાગમાં વહેંચવામાં આવ્યા છે — ગેઝેટેડ અને નોન-ગેઝેટ. ગેઝેટેડ ઓફિસરોને પોતાની સહી કે પ્રમાણિત કરવાનો અધિકાર હોય છે. સરકારે જે બોનસ જાહેર કર્યું છે તે માત્ર ગ્રુપ Bના નોન-ગેઝેટ ઓફિસરોને મળશે, જેમાં સીનિયર આસિસ્ટન્ટ કે સુપરવાઇઝર જેવા હોદ્દા આવે છે. ગ્રુપ Aના કર્મચારીઓ અને ગ્રુપ Bના મોટા ગેઝેટ અધિકારીઓને આ બોનસ નહીં મળે.
કેન્દ્રીય સશસ્ત્ર પોલીસ દળો અને સશસ્ત્ર દળોના પાત્ર કર્મચારીઓ પણ આ બોનસમાં સામેલ છે. આ આદેશ કેન્દ્રશાસિત પ્રદેશોના તે કર્મચારીઓને પણ લાગુ પડે છે, જેઓ કેન્દ્ર સરકારના પગાર માળખા હેઠળ આવે છે અને બીજી કોઈ બોનસ કે એક્સ-ગ્રેશિયા યોજનામાં આવતા નથી.
પાત્રતાની શરતો શું છે?
કર્મચારીએ નાણાકીય વર્ષ 2025-26 દરમિયાન ઓછામાં ઓછા છ મહિનાની સેવા સતત પૂરી કરવી પડશે. સાથે જ 31 માર્ચ 2026ના રોજ, એટલે કે હિસાબી વર્ષના છેલ્લા દિવસે, તે સેવામાં હોવો જરૂરી છે. જે કર્મચારીઓની સેવાનો સમયગાળો છ મહિનાથી વધુ પણ એક વર્ષથી ઓછો છે, તેમને પૂરા 6,908 રૂપિયાના બદલે તેમણે પૂરી કરેલા મહિનાના પ્રમાણમાં (પ્રો-રેટા) બોનસ આપવામાં આવશે.