કેન્દ્રીય ફિલ્મ પ્રમાણન બોર્ડ (CBFC) સાથે જોડાયેલો ડેટા લીક થવાનો મામલો સામે આવ્યો છે. અહેવાલ મુજબ, 500થી વધુ ફિલ્મોના સર્ટિફિકેશન રેકોર્ડ, શૂટિંગ સ્ક્રિપ્ટ, સેન્સર બોર્ડના કટ ઓર્ડર અને વિતરણ કરાર જેવી સંવેદનશીલ માહિતી ઓનલાઇન ઉપલબ્ધ હતી. તેમાં કેટલીક ફિલ્મોની લાઇસન્સિંગ ફી અને વ્યાવસાયિક શરતો સાથે જોડાયેલા દસ્તાવેજો પણ સામેલ હોવાનું જણાવાયું છે. મામલો સામે આવ્યા બાદ CBFCએ તપાસ અને ઓનલાઈન પોર્ટલના સુરક્ષા ઓડિટની વાત કરી છે.
CBFC ફિલ્મોને સિનેમાઘરોમાં રિલીઝ પહેલાં પ્રમાણપત્ર આપે છે. આ માટે ફિલ્મ નિર્માતાઓ અને પ્રોડક્શન હાઉસ ‘ઈ-સિનેપ્રમાણ’ (e-Cinepramaan) પોર્ટલ દ્વારા અરજી કરી જરૂરી દસ્તાવેજો જમા કરે છે. અહેવાલ મુજબ, આ જ પોર્ટલ સાથે જોડાયેલા દસ્તાવેજો કથિત રીતે લીક થયા હતા અને ઘણા દિવસો સુધી ઑનલાઇન ઉપલબ્ધ રહ્યા હતા. કેટલાક દસ્તાવેજો ઇન્ટરનેટ આર્કાઇવ દ્વારા ડાઉનલોડ કરી શકાય તેમ હતા. મામલો સામે આવ્યા બાદ સંબંધિત સામગ્રી હટાવી દેવામાં આવી છે.
લીક થયેલા દસ્તાવેજોમાં ફિલ્મોના શૂટિંગ સ્ક્રિપ્ટ અને સેન્સર બોર્ડ દ્વારા સૂચવાયેલા કટની માહિતી સામેલ હોવાનું જણાવાયું છે. સર્ટિફિકેશન માટે સબમિટ કરવામાં આવેલા અન્ય દસ્તાવેજો પણ સામે આવ્યા હોવાનો દાવો કરવામાં આવ્યો છે. ફિલ્મ રિલીઝ પહેલાં તેની સ્ક્રિપ્ટ અથવા સેન્સર બોર્ડના નિર્દેશો જાહેર થવાથી વાર્તા અને સંભવિત ફેરફારોની માહિતી સામે આવી શકે છે. તેનાથી નિર્માતાઓની સર્જનાત્મક યોજનાઓ અને રિલીઝ વ્યૂહરચના પર અસર થવાની આશંકા છે. જોકે, અસરગ્રસ્ત ફિલ્મો અને દસ્તાવેજોની સંપૂર્ણ માહિતી હજુ સ્પષ્ટ નથી.
રિપોર્ટ અનુસાર, લીક થયેલા દસ્તાવેજોમાં બ્રાઝિલની ફિલ્મ ‘ધ સિક્રેટ એજન્ટ’ અને હોલીવૂડની ફિલ્મ ‘ગુડ લક, હેવ ફન, ડોન્ટ ડાય’ના વિતરણ કરારો પણ સામેલ હતા. આ દસ્તાવેજોમાં ફિલ્મોના લાઇસન્સની ફીની માહિતી હોવાનો દાવો કરવામાં આવ્યો છે. રિપોર્ટ અનુસાર, ઓછામાં ઓછા ત્રણ કરારોમાં લાઇસન્સિંગ ફીનો ખુલાસો થયો છે. આવી માહિતી સામાન્ય રીતે વ્યાવસાયિક કરારોનો હિસ્સો હોય છે અને તેને ગુપ્ત રાખવામાં આવે છે.
ફિલ્મોના વિતરણ કરારમાં કમાણીની વહેંચણી, બૌદ્ધિક સંપદા અધિકારો, પ્રમોશનની જવાબદારીઓ અને રિલીઝની શરતોની માહિતી હોઈ શકે છે. આવી માહિતી જાહેર થવાથી નિર્માતાઓ, વિતરકો અને અન્ય વ્યાવસાયિક ભાગીદારો વચ્ચેની વાટાઘાટો પ્રભાવિત થઈ શકે છે. ભવિષ્યમાં ફિલ્મોના અધિકારો વેચવા, લાઇસન્સિંગ ફી નક્કી કરવા અને નવા કરારો કરતી વખતે પણ તેની અસર પડી શકે છે. જોકે, હાલમાં કોઈ ફિલ્મ નિર્માતાને થયેલા વાસ્તવિક આર્થિક નુકસાનની પુષ્ટિ થઈ નથી.
CBFCએ જણાવ્યું છે કે કથિત ડેટા લીકની તપાસ અને ઈ-સિનેપ્રમાણ પોર્ટલનું સુરક્ષા ઓડિટ કરાવવામાં આવી રહ્યું છે. બોર્ડના જણાવ્યા અનુસાર, અનધિકૃત ઍક્સેસ સાથે સંબંધિત માહિતીની સમીક્ષા કરવામાં આવી છે, પરંતુ કથિત રીતે ઉજાગર થયેલા દસ્તાવેજો સુધી વધારાની ઍક્સેસના પુરાવા મળ્યા નથી. અહેવાલ મુજબ, બોર્ડે જણાવ્યું છે કે કોઈ ફિલ્મ નિર્માતાનું વ્યક્તિગત એકાઉન્ટ હેક થયું હોવાના સંકેત મળ્યા નથી. તપાસ પૂર્ણ થયા બાદ જ સ્પષ્ટ થશે કે ડેટા કેવી રીતે જાહેર થયો અને કેટલા દસ્તાવેજો પ્રભાવિત થયા.
રિપોર્ટ મુજબ, ઇન્ટરનેટ આર્કાઇવે સંબંધિત એકાઉન્ટ હટાવી દીધું છે અને સાયબર ક્રાઇમ અધિકારીઓ સમક્ષ ફરિયાદ નોંધાવી છે. ભારતીય કમ્પ્યુટર ઇમરજન્સી રિસ્પોન્સ ટીમ (CERT-In)ને પણ તેની જાણ કરવામાં આવી છે. તપાસ ચાલુ છે. ડેટા લીકનું કારણ, દસ્તાવેજો સુધી પહોંચનો વ્યાપ અને સંભવિત નુકસાન હજુ સ્પષ્ટ થવાનું બાકી છે. આ મામલો ફિલ્મ ઉદ્યોગના ગોપનીય દસ્તાવેજોની ડિજિટલ સુરક્ષા અંગે ગંભીર સવાલો ઊભા કરે છે.