નવી દિલ્હીમાં યોજાયેલી બ્રિક્સ સમિટમાં સંયુક્ત ઘોષણાપત્ર બહાર પાડવામાં આવ્યું છે. આ ઘોષણાપત્રને 'નવી દિલ્હી ડિક્લેરેશન' નામ આપવામાં આવ્યું છે. વડાપ્રધાન નરેન્દ્ર મોદીએ સમિટમાં 10 પ્રસ્તાવો રજૂ કર્યા અને સંયુક્ત રાષ્ટ્ર સુરક્ષા પરિષદ (UNSC)માં સુધારાની તાતી જરૂરિયાત પર ભાર મૂક્યો.
પીએમ મોદીએ કહ્યું કે આજની બેઠક સાર્થક અને રચનાત્મક રહી. તેમણે બ્રિક્સ પર ટપાલ ટિકિટ પણ બહાર પાડી. તેમણે જણાવ્યું કે આપણી સહિયારી પ્રતિબદ્ધતા સામે આવી છે અને નવી દિલ્હી ડિક્લેરેશનને સ્વીકારવામાં આવ્યું છે.
પીએમ મોદીએ કહ્યું, 'આજે, જ્યારે દુનિયામાં કોઈ સંકટ આવે છે, ત્યારે ગ્લોબલ સાઉથ સૌથી આગળ ઊભા હોય છે, પરંતુ જ્યારે મોટા નિર્ણયો લેવાની વાત આવે છે, ત્યારે તેમને સૌથી પાછળ ધકેલી દેવામાં આવે છે. આપણે વિશેષાધિકારના આ 'પિરામિડ' ને બદલીને ભાગીદારીનું મંચ બનાવવું પડશે. એક એવું મંચ જ્યાં દરેક દેશનો અવાજ સાંભળવામાં આવે, દરેક સભ્યની ભાગીદારી હોય અને સમગ્ર માનવતાનો વિકાસ જ દરેક પ્રયાસના કેન્દ્રમાં હોય. આ લક્ષ્યને હાંસલ કરવા માટે, મારો પ્રસ્તાવ છે કે આપણે સૌ મળીને વૈશ્વિક ગવર્નન્સ સુધારાઓ માટે 10 પ્રસ્તાવ તૈયાર કરીએ, જેથી આગામી શિખર સંમેલન સુધી આપણે તેને 'બ્રિક્સ સુધાર રોડમેપ'નું રૂપ આપી શકીએ.'
પીએમ મોદીએ રજૂ કરેલા 10 પ્રસ્તાવોમાં નીચેના મુદ્દા સામેલ છે:
- UNSCમાં સુધારાને હવે ટાળી શકાય નહીં.
- ટેક્સ-બેસ્ડ નેગોશિએશનને નિશ્ચિત સમય મર્યાદા સાથે જોડવું પડશે.
- ગ્લોબલ ઇકોનોમીને ગ્રોથ આપનારા દેશોને નિર્ણય લેવાનો અધિકાર હોવો જોઈએ.
- આપણે કલેક્ટિવ રિસ્પોન્સ, સ્પીડ, સ્કિલ અને ઇમ્પેક્ટ પર ભાર મૂકવો પડશે.
- વૈશ્વિક સંસ્થાઓમાં માનવતાના વિશ્વાસ માટે પ્રભાવી ઉકેલ જરૂરી છે.
- આપણે સીફેરર ઇમરજન્સી સપોર્ટ નેટવર્ક બનાવી શકીએ છીએ.
- ડિસ્ટ્રેસ એલર્ટ, મેડિકલ હેલ્પ, પરિવારોને માહિતી અને ઇવેક્યુએશનમાં મદદ મળે.
- ગ્લોબલ સાઉથની સમાન ભાગીદારી સુનિશ્ચિત કરવી આવશ્યક છે.
- AI-સાયબર સ્પેસમાં ભવિષ્યની તકોની સાથે નિયમો નક્કી થાય.
- ગ્લોબલ સાઉથને હવે રૂલ ટેકરમાંથી રૂલ શેપર બનાવો.
ઈરાનના રાષ્ટ્રપ્રમુખ પેઝેશ્કિયને કહ્યું કે બહુપક્ષવાદનો અર્થ ત્યારે જ છે, જ્યારે કાયદા સમક્ષ બધા સમાન હોય. ગ્લોબલ ગવર્નન્સને ત્યારે જ માન્યતા મળશે જ્યારે વિકાસશીલ દેશોનો અવાજ સાંભળવામાં આવશે. અમે એવી દુનિયા ઇચ્છીએ છીએ, જ્યાં કાયદાની જગ્યા તાકાત ન લે, સહયોગની જગ્યા પ્રતિબંધ ન લે, વાતચીતની જગ્યા યુદ્ધ ન લે અને ભાગીદારીની જગ્યા એકાધિકાર ન લે. સમાવેશી વૈશ્વિક શાસન અને બહુપક્ષવાદનો આ જ અસલી અર્થ છે.
રોઇટર્સના રિપોર્ટ મુજબ, ચીની રાષ્ટ્રપ્રમુખ શી જિનપિંગે નવી દિલ્હીમાં સભ્ય દેશોના શિખર સંમેલનને સંબોધિત કરતા બ્રિક્સ સમૂહને મધ્ય પૂર્વના સંઘર્ષમાં શાંતિ લાવવાની ભૂમિકા ભજવવાની અપીલ કરી. સરકારી ટીવી ચેનલ CCTVના અનુસાર, શી જિનપિંગે કહ્યું કે ચીન આ ભૂમિકામાં અન્ય બ્રિક્સ સભ્યોની સાથે મળીને કામ કરશે, કારણ કે આ યુદ્ધ 'આંતરરાષ્ટ્રીય સમુદાયના સહિયારા હિતોને અનુરૂપ નથી'. ચીન આવતા વર્ષે બ્રિક્સની અધ્યક્ષતા સંભાળશે અને 19મા બ્રિક્સ શિખર સંમેલનની યજમાની કરશે.