ઝારખંડના પલામુ લોકસભા મતવિસ્તારના પૂર્વ સાંસદ બ્રજમોહન રામને ઓડિશાના નવા રાજ્યપાલ તરીકે નિયુક્ત કરવામાં આવ્યા છે. આ નિયુક્તિની જાહેરાત બાદ તેમણે એક રસપ્રદ પ્રસંગ જણાવ્યો છે.
તેમણે કહ્યું કે મંગળવારે સવારે તેમના મોબાઇલ પર એક ખાનગી નંબર પરથી વારંવાર ફોન આવી રહ્યા હતા. સ્ક્રીન પર નંબર દેખાતો ન હોવાથી તેમણે ફોન ઉપાડવાનું ટાળ્યું. આમ, વડાપ્રધાન નરેન્દ્ર મોદીએ તેમને 10 વખત ફોન કર્યો, પણ તેમણે ઉપાડ્યો નહીં. બાદમાં તેમને જાણ કરવામાં આવી કે વડાપ્રધાન તેમની સાથે વાત કરવા માગે છે. ત્યારબાદ વડાપ્રધાનનો ફોન આવતાં તેમણે વાત કરી. મોદીએ ‘જોહાર’ કહીને અભિવાદન કર્યું અને સંગઠન સંબંધિત વિગતો પૂછી. તેમણે એમ પણ જણાવ્યું કે તેમને સરકાર તરફથી મોટી જવાબદારી સોંપવામાં આવી રહી છે.
બ્રજમોહન રામના જણાવ્યા અનુસાર, બપોરે કેન્દ્રીય ગૃહમંત્રી અમિત શાહનો પણ ફોન આવ્યો હતો. તેમણે ઓડિશાના રાજ્યપાલ બનાવવામાં આવી રહ્યા હોવાની જાણ કરી. જોકે, આ માહિતી અન્ય કોઈને ન આપવા માટે પણ કહેવામાં આવ્યું હતું.
આ નિયુક્તિને ઝારખંડ ભાજપના નેતાઓએ રાજ્ય માટે ગૌરવની બાબત ગણાવી છે. ભાજપના પ્રદેશ પ્રમુખ આદિત્ય સાહુ અને કેન્દ્રીય સંરક્ષણ રાજ્યમંત્રી સંજય સેઠે તેમને અભિનંદન પાઠવ્યાં છે. વિપક્ષના નેતા બાબુલાલ મરાંડીએ વિશ્વાસ વ્યક્ત કર્યો કે બ્રજમોહન રામ પોતાના અનુભવ અને માર્ગદર્શનથી ઓડિશામાં બંધારણીય જવાબદારીઓ સફળતાપૂર્વક નિભાવશે.
ભાજપના નેતા અને મોરચાના સ્થાપક પ્રમુખ રણજીત રામે આ નિયુક્તિ બદલ રાષ્ટ્રપતિ દ્રૌપદી મુર્મુ અને વડાપ્રધાન નરેન્દ્ર મોદીનો આભાર માન્યો છે. તેમણે કહ્યું કે બ્રજમોહન રામને રાજ્યપાલની જવાબદારી મળવી ઝારખંડના દલિત સમાજ માટે ગૌરવ અને આનંદની બાબત છે. ભાજપે અનુસૂચિત જાતિ અને અનુસૂચિત જનજાતિના લોકોને રાષ્ટ્રપતિ તથા રાજ્યપાલ જેવા બંધારણીય પદો સુધી પહોંચાડીને પ્રતિનિધિત્વ આપ્યું છે.