બોટાદના સાળંગપુર રેલવે અંડરબ્રિજમાં વરસાદ ન વરસ્યો હોવા છતાં પાણી ભરાઈ જવાની ઘટના સામે આવી છે. આ અંડરબ્રિજ બોટાદને સાળંગપુર અને અમદાવાદ સાથે જોડે છે. ઘૂંટણસમું પાણી ભરાવાથી વાહનચાલકો અને મુસાફરોને ભારે હાલાકીનો સામનો કરવો પડી રહ્યો છે.
અંડરબ્રિજના રસ્તા પર મોટા ખાડા પડી ગયા છે. તેમાં પાણી ભરાવાથી અકસ્માતનું જોખમ વધી ગયું છે. વાહનવ્યવહાર ખોરવાયો છે અને લોકોને આવ-જા કરવામાં તકલીફ પડી રહી છે.
આ માર્ગ બોટાદ માટે મહત્વપૂર્ણ છે, કારણ કે કલેક્ટર કચેરી, એસપી કચેરી, જિલ્લા પંચાયત અને જિલ્લા કોર્ટ જેવી અનેક સરકારી કચેરીઓ આ રસ્તા પર આવેલી છે. દરરોજ હજારો નાગરિકો સરકારી કામકાજ માટે આ માર્ગનો ઉપયોગ કરે છે. અનેક નેતાઓ અને અધિકારીઓ પણ આ માર્ગેથી પસાર થાય છે.
સ્થાનિક લોકોએ આ સમસ્યા માટે તંત્રની બેદરકારીને જવાબદાર ગણાવી છે. તેમનો આક્ષેપ છે કે અંડરબ્રિજના નિર્માણમાં ભ્રષ્ટાચાર થયો હોવાથી વારંવાર પાણી ભરાય છે. લોકોએ તાત્કાલિક પાણીનો નિકાલ કરવા અને રસ્તાનું સમારકામ કરવાની માંગ કરી છે.