મુંબઈના ઘાટકોપર ઈસ્ટ વિધાનસભા ક્ષેત્રના ભાજપ ધારાસભ્ય પરાગ શાહે એક દિવસ માટે ભિખારીનો વેશ ધારણ કર્યો હતો. લગભગ 5,000 કરોડ રૂપિયાની સંપત્તિ ધરાવતા પરાગ શાહે આ નિર્ણય તેમના ગુરુના કહેવાથી લીધો હતો, જેથી તેઓ રસ્તા પર રહેતા લોકોની મુશ્કેલીઓ નજીકથી સમજી શકે.
એક દિવસ દરમિયાન તેમણે ભીખ માંગીને કુલ 84 રૂપિયા કમાયા. આ ઉપરાંત એક રાહદારીએ તેમને 20 રૂપિયા આપ્યા હતા. તેમનો આ લુક સોશિયલ મીડિયા પર વાયરલ થયો છે, જેને લોકોએ જાતજાતની પ્રતિક્રિયાઓ આપી છે.
ઘટના સમયે પરાગ શાહને કોઈ ઓળખી શક્યું ન હતું. તેમણે પોતાનો દેખાવ પૂરો બદલી નાખ્યો હતો અને ઘાટકોપરની શેરીઓમાં ભિખારી તરીકે ફર્યા હતા. આ નિર્ણય પાછળનું કારણ તેમના ગુરુની સલાહ હતી, જેમણે તેમને એક દિવસ રસ્તા પર ભિખારી બનીને રહેવા અને સામાન્ય લોકોની તકલીફો સમજવા કહ્યું હતું.