માઇક્રોસોફ્ટના સહ-સ્થાપક બિલ ગેટ્સે આર્ટિફિશિયલ ઇન્ટેલિજન્સ (AI) અંગે ગંભીર ચેતવણી આપી છે. તેમણે કહ્યું છે કે ખોટા હાથમાં જો AI આવી જાય તો તે એટલું શક્તિશાળી બની શકે છે કે તેનાથી 100 કરોડ લોકોના મોત પણ થઈ શકે છે.
એક ઇન્ટરવ્યૂમાં ગેટ્સે જણાવ્યું કે ખરાબ ઇરાદા ધરાવતા લોકો સાથે AI ટૂલ્સનો સંયોગ અત્યાર સુધીના કોઈપણ હથિયાર કરતાં વધુ ખતરનાક બની શકે છે. તેમણે આ જોખમને ગંભીરતાથી લેવાની સલાહ આપી છે.
ગેટ્સે અમેરિકન સરકાર પાસે AI અંગે કાયદો બનાવવાની માંગ કરી છે. તેમણે કહ્યું કે માત્ર કંપનીઓનું નિયંત્રણ પૂરતું નથી, સરકારી દેખરેખ અને નિયમોનો અમલ જરૂરી છે. ગેટ્સે ઓગસ્ટમાં પ્રકાશિત તેમના એક લેખમાં પણ AIના ત્રણ મોટા જોખમો દર્શાવ્યા હતા.
બીજી તરફ, દુનિયામાં પહેલીવાર કોઈ AI મોડેલે સરકારી પોર્ટલ હેક કર્યું છે. આ ઘટના ઓસ્ટ્રેલિયામાં બની છે. OpenAIનું એક AI મોડેલ ઓસ્ટ્રેલિયાની હેલ્થ ડેટા સિસ્ટમમાં ઘૂસી ગયું હતું. તેણે ફાઇલો સુધી પહોંચીને માહિતી મેળવી હતી. જેમાં હેલ્થ ખર્ચ અને દવા સબસિડી સાથે જોડાયેલો ડેટા હતો.
OpenAIએ આ ઘટના વિશે 54 દિવસ બાદ સરકારને જાણ કરી. ત્યારબાદ, વડાપ્રધાન અલ્બનીઝે ન્યૂયોર્કમાં OpenAIના પ્રમુખ સેમ ઓલ્ટમેન સાથે ફોન પર વાત કરીને વિલંબ અંગે નારાજગી વ્યક્ત કરી હતી.
આ દરમિયાન OpenAIના CEO સેમ ઓલ્ટમેને કહ્યું કે હવે AI પર નિયંત્રણ રાખવું જરૂરી બની ગયું છે. તેમણે ચેતવણી આપી કે જો માનવીય નિયંત્રણ ગુમાવાશે તો સ્થિતિ ખૂબ ખરાબ થશે.
ઓસ્ટ્રેલિયા હવે તપાસ કરશે કે કંપની સામે ફોજદારી કેસ બને છે કે નહીં. આ પણ તપાસવામાં આવી રહ્યું છે કે ઓસ્ટ્રેલિયાની સુરક્ષા એજન્સીઓ આ ઘૂસણખોરીને પહેલાં કેમ પકડી શકી નહીં.
OpenAIએ પણ સ્વીકાર્યું કે તેના મોડેલોએ એવા પગલાં લીધાં, જે કંપનીનો ઇરાદો નહોતો. ઓલ્ટમેને કહ્યું કે દુનિયાના તમામ દેશોએ મળીને સુરક્ષા ધોરણો નક્કી કરવા જોઈએ, જેથી ટેક્નોલોજી વધુ શક્તિશાળી બને ત્યારે પણ નિયંત્રણમાં રહે.