રાજસ્થાનના બિકાનેર જિલ્લાના દેશનોક પોલીસ સ્ટેશન વિસ્તારમાં એક દુઃખદ ઘટના બની છે. ખેતરમાં બનેલી ડિગ્ગીમાં (પાણીના ટાંકામાં) ડૂબી જવાથી ત્રણ સગા ભાઈઓ પંકજ, ક્રિસ અને કાર્તિકના મોત થયા છે. આ ઘટનાથી આસપાસના વિસ્તારમાં અરેરાટી ફેલાઈ ગઈ છે અને પરિવારમાં માતમ છવાઈ ગયો છે.
મૃતકો હરિયાણાના હિસાર જિલ્લાના આદમપુર મંડી વિસ્તારના રહેવાસી હોવાનું કહેવાય છે. તેમનો પરિવાર ખેતરમાં કામ કરવા માટે દેશનોક વિસ્તારમાં આવ્યો હતો. ઘટના સમયે ત્રણેય બાળકો ડિગ્ગી પાસે પહોંચી ગયા હતા. એક બાળક પાણીમાં ડૂબવા લાગ્યો, તેને બચાવવાના પ્રયાસમાં બાકીના બે ભાઈઓ પણ પાણીમાં ઉતરી ગયા. પાણી ઊંડું હોવાને કારણે ત્રણેય ડૂબી ગયા.
ઘટનાની જાણ થતાં જ સ્થાનિક લોકો અને પરિવારના સભ્યોએ બાળકોને બહાર કાઢવાનો પ્રયાસ કર્યો, પરંતુ ત્યાં સુધીમાં તેમના મોત થઈ ચૂક્યા હતા. માહિતી મળતાં જ દેશનોક પોલીસ સ્ટેશનનો કાફલો ઘટનાસ્થળે પહોંચ્યો અને ઘટના અંગે માહિતી મેળવી.
પોલીસના જણાવ્યા અનુસાર પરિજનોએ ત્રણેય બાળકોના મૃતદેહનું પોસ્ટમોર્ટમ કરાવવાનો ઇનકાર કરી દીધો છે. પોલીસે અકસ્માતે મોતનો ગુનો નોંધ્યો છે અને જરૂરી કાર્યવાહી બાદ ત્રણેય મૃતદેહ પરિજનોને સોંપી દીધા છે. દેશનોક થાણા અધિકારી સુમન શેખાવતના નેતૃત્વમાં પોલીસ મામલાની તપાસ કરી રહી છે અને અકસ્માતના કારણો વિશે માહિતી એકઠી કરી રહી છે. પ્રાથમિક માહિતીમાં એક બાળકને બચાવવાના પ્રયાસમાં ત્રણેય ડિગ્ગીમાં ડૂબી ગયા હોવાની વાત સામે આવી છે. પોલીસ તપાસ બાદ અન્ય તથ્યો સ્પષ્ટ થશે. ઘટના બાદ ગામમાં શોકનો માહોલ છે.