બિહારના વૈશાલી જિલ્લાના રાઘોપુર વિસ્તારમાં ગંગા નદીમાં એક નાની હોડી પલટી જવાથી 13 બાળકોના મોત થયા છે. આ દુર્ઘટના શુક્રવારે રાત્રે આશરે 8:30 વાગ્યે થઈ, જ્યારે 25થી વધુ લોકો શ્રાદ્ધના ભોજનમાં જવા માટે હોડીમાં નદી પાર કરી રહ્યા હતા.
પોલીસના જણાવ્યા અનુસાર, મૃતકોમાં પિંકી કુમારી, અંકિતા કુમારી, સુનીતા કુમારી, આર્યન કુમાર, અલીશા કુમારી, સીકી કુમારી, ભોણૂ કુમારી અને મીરા કુમારીનો સમાવેશ થાય છે. મૃતકોની ઉંમર 6થી 18 વર્ષની વચ્ચે હતી. મરનારાઓમાં એક જ પરિવારની 7 બાળકીઓ હોવાનું સામે આવ્યું છે.
વૈશાલીના જિલ્લા મેજિસ્ટ્રેટ વર્ષા સિંહે જણાવ્યું કે, 7 ઈજાગ્રસ્તોને પટના મેડિકલ કોલેજ હોસ્પિટલમાં સારવાર માટે મોકલવામાં આવ્યા છે. કેટલાક લોકો લાપતા હોવાની માહિતી મળી છે, પરંતુ તેમની સંખ્યા હજુ સ્પષ્ટ થઈ નથી. એસડીઆરએફની ટીમ બચાવ કાર્યમાં જોડાઈ છે અને શોધખોળ ચાલુ છે.
સ્થાનિક લોકોએ જણાવ્યું કે, રામપુર શ્યામચંદ પંચાયતના ભગતાન ટોલાના માતા મહારાણી સ્થાન પાસે સિંઘેશ્વર રાયના ઘરે ભોજનનું આયોજન હતું. આશરે 20 યુવકો અને બાળકો નાની હોડીમાં બેસીને તે તરફ જઈ રહ્યા હતા.
મુખ્યમંત્રી સમ્રાટ ચૌધરીએ દુર્ઘટનાને અત્યંત દુઃખદ અને હૃદયદ્રાવક ગણાવી છે. તેમણે કહ્યું, "આ મુશ્કેલ સમયમાં મારી સંવેદનાઓ શોકગ્રસ્ત પરિવારો સાથે છે. ઈશ્વર દિવંગત આત્માઓને શાંતિ આપે અને શોકગ્રસ્ત પરિવારોને આ અપાર દુઃખ સહન કરવાની શક્તિ આપે."
રાજ્ય સરકારે મૃતકોના પરિવારજનોને 4-4 લાખ રૂપિયા અને ઈજાગ્રસ્તોને 50-50 હજાર રૂપિયાની વળતરની જાહેરાત કરી છે. પીએમઓ તરફથી પણ મૃતકોના પરિવારજનોને 2-2 લાખ રૂપિયા અને ઈજાગ્રસ્તોને 50-50 હજાર રૂપિયાની સહાય જાહેર કરવામાં આવી છે. વિપક્ષના નેતા તેજસ્વી યાદવ, જે આ વિસ્તારના ધારાસભ્ય છે, તેમણે સોશિયલ મીડિયા પર દુઃખ વ્યક્ત કર્યું છે.