ઇન્દોરના ડેઇલી કોલેજ મેદાન પર બુધવારે રમાયેલી સૈયદ મુશ્તાક અલી ટ્રોફીની એલિટ ગ્રુપ-B મેચમાં બિહારે દિલ્હીને 2 વિકેટે હરાવ્યું. કેપ્ટન વૈભવ સૂર્યવંશી આ મેચમાં રમ્યા નહોતા. રાઇઝિંગ એશિયા કપ માટે ભારતીય ટીમમાં પસંદગી થયા બાદ તેઓ ટીમ સાથે જોડાઈ ગયા હતા. તેમની ગેરહાજરીમાં બિહારે 225 રનનો ટાર્ગેટ 19.5 ઓવરમાં પૂરો કરી લીધો. છેલ્લી ઓવરમાં જીત માટે 10 રનની જરૂર હતી, અને બિહારે એક બોલ બાકી રહેતા મેચ જીતી લીધી.
ટોસ હારીને પહેલા બેટિંગ કરેલી દિલ્હી તરફથી યશ ધુલે સદી ફટકારી. તેમણે 59 બોલમાં 125 રન બનાવ્યા, જેમાં 16 ચોગ્ગા અને 7 છગ્ગા સામેલ હતા. યશે તેજસ્વી દહિયા સાથે ચોથી વિકેટ માટે 126 રનની ભાગીદારી કરી. દહિયાએ 25 બોલમાં 51 રન બનાવ્યા. આ ઇનિંગ્સના આધારે દિલ્હીએ 224 રનનો સ્કોર બનાવ્યો.
લક્ષ્યનો પીછો કરવા ઉતરેલી બિહારની ટીમે આક્રમક શરૂઆત કરી. આયુષ લોહરુકાએ 22 બોલમાં 50 રન અને બિપિન સૌરભે 19 બોલમાં 49 રન બનાવ્યા. બંનેએ બીજી વિકેટ માટે 92 રન જોડ્યા અને ટીમને મજબૂત સ્થિતિમાં પહોંચાડી. ત્યારબાદ રઘુવેન્દ્ર પ્રતાપ સિંહે 15 બોલમાં 25 રન બનાવ્યા. અંતિમ ઓવરોમાં મયંક કુમારે 13 બોલમાં અણનમ 24 રન અને પ્રશાંત સિંહે 8 બોલમાં અણનમ 13 રન બનાવીને ટીમને જીત અપાવી.
બીજી મેચમાં મુંબઈમાં રમાયેલી એલિટ ગ્રુપ-Aની મેચમાં બંગાળે ઝારખંડને 7 વિકેટે હરાવ્યું. બંગાળે 149 રનનો લક્ષ્યાંક 18.4 ઓવરમાં 3 વિકેટ ગુમાવીને હાંસલ કરી લીધો. કેપ્ટન અભિમન્યુ ઈશ્વરને 48 બોલમાં અણનમ 61 રન બનાવ્યા.
ઝારખંડે પ્રથમ બેટિંગ કરતાં 20 ઓવરમાં 7 વિકેટે 148 રન બનાવ્યા. વિરાટ સિંહે અણનમ 45 અને શિખર મોહને 42 રન બનાવ્યા. બંગાળ તરફથી ઋષભ ચૌધરી, સાયન ઘોષ અને મુકેશ કુમારે 2-2 વિકેટ ઝડપી.
અન્ય મેચમાં મોહાલીમાં રમાયેલી એલિટ ગ્રુપ-Cની મેચમાં આંધ્રએ કેરળમને 29 રનથી હરાવ્યું. આંધ્રએ પ્રથમ બેટિંગ કરતા 20 ઓવરમાં 7 વિકેટે 225 રન બનાવ્યા. જવાબમાં કેરળમની ટીમ 20 ઓવરમાં 5 વિકેટે માત્ર 196 રન બનાવી શકી.
આંધ્ર માટે સીરમ રાહુલે 30 બોલમાં 64 રન બનાવ્યા, જેમાં 5 ચોગ્ગા અને 4 છગ્ગા સામેલ હતા. શેખ રાશિદે 39 બોલમાં 60 રન અને અશ્વિન હેબ્બારે 15 બોલમાં 37 રનની ઇનિંગ રમી. એમ હેમંત રેડ્ડીએ 16 બોલમાં 32 રન બનાવ્યા. કેરળમ તરફથી એમડી નિધીશે 3 વિકેટ લીધી, જ્યારે બીજુ નારાયણને 2 વિકેટ મળી.