પાકિસ્તાને પંજાબના મુખ્યમંત્રી ભગવંત માનને લાહોરમાં યોજાનાર 'વિશ્વ પંજાબી સંમેલન'માં મુખ્ય અતિથિ તરીકે આમંત્રણ આપ્યું છે. આ અંગે ભારતીય વિદેશ મંત્રાલયે સ્પષ્ટ કર્યું છે કે અન્ય દેશો સાથેના સંબંધો અંગે ભારતની એક ચોક્કસ રાષ્ટ્રીય નીતિ છે અને સરકાર આશા રાખે છે કે દરેક વ્યક્તિ તેનું પાલન કરશે.
વિદેશ મંત્રાલયના પ્રવક્તા રણધીર જયસ્વાલે જણાવ્યું કે, 'જ્યાં સુધી વિદેશ પ્રવાસે જનારા મહાનુભાવોને રાજકીય મંજૂરી આપવાનો સવાલ છે, તો વિદેશ મંત્રાલય પોતાની સંપૂર્ણ પ્રક્રિયા મુજબ તેનું આકલન કરે છે અને તેના આધારે જ આગળની કાર્યવાહી કરવામાં આવે છે.'
તેમણે વધુમાં કહ્યું કે, 'પહેલગામ આતંકી હુમલા બાદ પાકિસ્તાન પ્રત્યે ભારતનું વલણ શું છે, તે દરેક માટે સ્પષ્ટ હોવું જોઈએ.' ઉલ્લેખનીય છે કે પાકિસ્તાનના પંજાબ પ્રાંતના લઘુમતી બાબતોના મંત્રી રમેશ સિંહ અરોરાએ ભગવંત માન અને પંજાબ વિધાનસભાના સભ્યોને પાકિસ્તાન આવવા માટે ઔપચારિક અને મૌખિક આમંત્રણ આપ્યું છે. તેમણે જણાવ્યું કે આ નિમંત્રણ પાકિસ્તાન પંજાબના મુખ્યમંત્રી મરિયમ નવાઝ તરફથી પણ પાઠવવામાં આવ્યું છે.
આ ઉપરાંત, વિદેશ મંત્રાલયે પેરિસમાં યોજાયેલી ફાઇનાન્શિયલ એક્શન ટાસ્ક ફોર્સ (FATF)ની બેઠકોમાં ભારતના ભાગ લેવા અંગે પણ માહિતી આપી. પ્રવક્તાએ કહ્યું કે, 'અમે પેરિસમાં FATFની પૂર્ણ બેઠક અને કાર્યકારી જૂથની બેઠકોમાં ભાગ લીધો છે. આ બેઠકોમાં મની લોન્ડરિંગ, ટેરર ફંડિંગ અને વિનાશક હથિયારોના પ્રસાર માટે થતા ફંડિંગને રોકવા માટે વૈશ્વિક નેટવર્કને મજબૂત બનાવવા પર ચર્ચા થઈ.'
ભારત-બાંગ્લાદેશ વચ્ચે ટૂંક સમયમાં યોજાનાર કોન્સ્યુલર વાર્તા અંગે પણ પ્રવક્તાએ જણાવ્યું કે, 'બંને દેશો સકારાત્મક, રચનાત્મક અને ભવિષ્યલક્ષી સંબંધ ઈચ્છે છે. વેપાર, રેલવે, જળ સંસાધન અને સરહદ વ્યવસ્થાપન જેવા ક્ષેત્રોમાં નક્કી કરાયેલી વ્યવસ્થાઓ હેઠળ અનેક પહેલ કરવામાં આવી છે.' તેમણે ઉમેર્યું કે, 'કોન્સ્યુલર વાર્તાનો આગામી તબક્કો, જેમાં સુધારેલી મુસાફરી વ્યવસ્થાઓ સાથે જોડાયેલા મુદ્દાઓ પર ચર્ચા થશે, તે પરસ્પર સહમતિથી નક્કી કરાયેલી તારીખે યોજાશે. ભારત બાંગ્લાદેશ સાથે તમામ દ્વિપક્ષીય મુદ્દાઓ પર ચર્ચા કરવા તૈયાર છે.'