પંજાબના મુખ્યમંત્રી ભગવંત માને ગુરુ નાનક દેવજીના 557મા પ્રકાશ પર્વ નિમિત્તે પાકિસ્તાનમાં નારોવાલ નજીક આવેલા ગુરુદ્વારા દરબાર સાહિબ, શ્રી કરતારપુર સાહિબમાં દર્શન કરવા માટે વિદેશ મંત્રાલય પાસે ઔપચારિક મંજૂરી માંગી છે. તેઓ 24 નવેમ્બર 2026ના રોજ ત્યાં જઈને માથું ટેકવવા માંગે છે. મંત્રાલય તરફથી આ અંગે હજુ કોઈ નિર્ણય જાહેર થયો નથી.
કરતારપુર કોરિડોર 7 મે 2025થી બંધ છે. પહેલગામ આતંકી હુમલા અને 'ઓપરેશન સિંદૂર' બાદ ભારત અને પાકિસ્તાન વચ્ચે આ માર્ગ બંધ કરવામાં આવ્યો હતો. આ કોરિડોર ભારતીય શ્રદ્ધાળુઓને વિઝા વગર કરતારપુર સાહિબમાં દર્શન કરીને તે જ દિવસે પરત ફરવાની સુવિધા આપે છે.
મુખ્યમંત્રી માન છેલ્લા કેટલાક અઠવાડિયાથી પ્રકાશ પર્વ નિમિત્તે શ્રદ્ધાળુઓ માટે કોરિડોર ફરી ખોલવા વડાપ્રધાન નરેન્દ્ર મોદીને અપીલ કરી રહ્યા છે. આ સંદર્ભે પંજાબ વિધાનસભામાં પણ પ્રસ્તાવ પસાર કરીને કેન્દ્ર સરકારને કોરિડોર શરૂ કરવા વિનંતી કરવામાં આવી છે.
આ પહેલાં મુખ્યમંત્રી માને પાકિસ્તાનના લાહોરમાં 27થી 29 નવેમ્બર 2026 દરમિયાન યોજાનારી આંતરરાષ્ટ્રીય પંજાબી કોન્ફરન્સમાં સામેલ થવાની ઈચ્છા પણ વ્યક્ત કરી હતી. પાકિસ્તાનના લઘુમતી બાબતોના મંત્રી રમેશ સિંહ અરોરાએ મુખ્યમંત્રી માન અને પંજાબ વિધાનસભાના તમામ સભ્યોને આમંત્રણ આપ્યું હતું. જોકે, વિદેશ મંત્રાલયે સ્પષ્ટ કર્યું હતું કે પાકિસ્તાન પ્રવાસની મંજૂરી ભારતની રાષ્ટ્રીય નીતિ મુજબ જ આપવામાં આવશે.