બોક્સિંગ ફેડરેશન ઑફ ઇન્ડિયા (BFI)ના પ્રમુખ અજય સિંહે મહાસચિવ પ્રમોદ કુમારને તાત્કાલિક અસરથી સસ્પેન્ડ કર્યા છે. પ્રમોદ કુમાર પર નાણાકીય ગેરરીતિ, તપાસમાં સહયોગ ન કરવો અને સત્તાના દુરુપયોગના આરોપો છે. તપાસ પૂરી ન થાય ત્યાં સુધી તેમનું સસ્પેન્શન ચાલુ રહેશે.
મંગળવારે જારી કરાયેલા આદેશમાં અજય સિંહે જણાવ્યું કે પ્રમોદ કુમારે જરૂરી મંજૂરી વગર પ્રસારણ વ્યવસ્થા માટે વર્ક ઓર્ડર જારી કર્યો હતો. અજય સિંહ ભારતીય બોક્સિંગ મહાસંઘના પ્રમુખ છે.
પ્રમોદ કુમાર પર નેશનલ ચેમ્પિયનશિપ રદ થવાની તપાસમાં સહયોગ ન કરવાનો આરોપ છે. આ ઉપરાંત, તેમણે BFI પ્રમુખ વિરુદ્ધ અવિશ્વાસ પ્રસ્તાવ લાવવા માટે અનધિકૃત બેઠક બોલાવવાનો પ્રયાસ પણ કર્યો હતો.
આદેશ અનુસાર, પ્રમોદ કુમારને મહાસચિવ પદેથી તાત્કાલિક અસરથી વચગાળાના ધોરણે સસ્પેન્ડ કર્યા છે. આ કાર્યવાહી તપાસ પૂરી થાય અથવા સક્ષમ સત્તાધિકારીના આદેશમાં ફેરફાર કરવામાં આવે અથવા તેને રદ કરવામાં આવે ત્યાં સુધી અમલમાં રહેશે. આદેશમાં સ્પષ્ટ કરવામાં આવ્યું છે કે સસ્પેન્શન વચગાળાનું પગલું છે અને તેને આરોપો અંગેનો અંતિમ નિર્ણય માનવામાં આવશે નહીં.
પ્રમોદ કુમારે 13 ઓક્ટોબરે વડાપ્રધાન નરેન્દ્ર મોદીને પત્ર લખીને BFIના અધ્યક્ષ અજય સિંહ અને કાર્યકારી નિયામક કર્નલ અરુણ મલિક પર આરોપો લગાવ્યા હતા. કુમારે દાવો કર્યો હતો કે બંનેએ અજય સિંહ વિરુદ્ધ પ્રસ્તાવિત અવિશ્વાસ પ્રસ્તાવને રોકવા માટે તેમને 'ફોજદારી ધમકી' આપી હતી. જોકે, કર્નલ અરુણ મલિકે આ આરોપોને 'પાયાવિહોણા' ગણાવ્યા હતા.