ન્યૂઝીલેન્ડના યુવા બેટર બેવોન જેકોબ્સે ઘરેલુ ક્રિકેટમાં ઐતિહાસિક ઇનિંગ રમી છે. ફોર્ડ ટ્રોફીમાં ઓકલેન્ડ તરફથી રમતાં ઓટાગો સામે તેણે 137 બોલમાં અણનમ 202 રન ફટકાર્યા હતા. આ ઇનિંગમાં 21 છગ્ગા અને 7 ચોગ્ગાનો સમાવેશ થાય છે.
આ સાથે જેકોબ્સ લિસ્ટ-A ક્રિકેટની એક ઇનિંગમાં સૌથી વધુ છગ્ગા ફટકારનાર ન્યૂઝીલેન્ડનો બેટર બન્યો છે. 12 નવેમ્બર, ગુરુવારે ઓકલેન્ડના ઈડન પાર્કમાં રમાયેલી આ મેચમાં જેકોબ્સ ચોથા ક્રમે બેટિંગ કરવા ઉતર્યો હતો. તેણે પોતાની પ્રથમ લિસ્ટ-A સદી પૂરી કર્યા બાદ તેને બેવડી સદીમાં ફેરવી દીધી હતી.
જેકોબ્સ લિસ્ટ-A ક્રિકેટની એક ઇનિંગમાં સૌથી વધુ છગ્ગા ફટકારવાના વિશ્વ રેકોર્ડથી માત્ર બે છગ્ગા દૂર રહી ગયો હતો. આ રેકોર્ડ ઓસ્ટ્રેલિયાના ડાર્સી શોર્ટના નામે છે. તેણે 2018માં વેસ્ટર્ન ઓસ્ટ્રેલિયા તરફથી રમતાં ક્વીન્સલેન્ડ સામે 257 રનની ઇનિંગમાં 23 છગ્ગા ફટકાર્યા હતા.
આ ઉપરાંત જેકોબ્સ લિસ્ટ-A ક્રિકેટમાં બેવડી સદી ફટકારનારો ન્યૂઝીલેન્ડનો ચોથો બેટર બન્યો છે. તેના પહેલાં જેમી હો (2012), માર્ટિન ગપ્ટિલ (2015) અને ચાડ બોવેસ (2024) આ સિદ્ધિ મેળવી ચૂક્યા છે.
બેવોન જેકોબ્સ IPL 2024 દરમિયાન પાંચ વખતની ચેમ્પિયન મુંબઈ ઇન્ડિયન્સ ટીમ સાથે જોડાયો હતો. જોકે, 2025ની સિઝનમાં તેને એક પણ મેચ રમવાની તક મળી નહોતી. ત્યારબાદ ફ્રેન્ચાઇઝીએ તેને રિલીઝ કરી દીધો હતો.
જેકોબ્સનો જન્મ દક્ષિણ આફ્રિકાના પ્રિટોરિયામાં થયો હતો. તે લગભગ ત્રણ વર્ષનો હતો ત્યારે તેનો પરિવાર ન્યૂઝીલેન્ડ આવી ગયો હતો. 2023-24ની સુપર સ્મેશ ટૂર્નામેન્ટમાં કેન્ટરબરી કિંગ્સ તરફથી રમતાં તેણે છ ઇનિંગમાં 134 રન બનાવ્યા હતા. આ દરમિયાન તેનો સ્ટ્રાઇક રેટ 188.73 રહ્યો હતો. ભારત સામે તાજેતરમાં રમાયેલી પાંચ મેચની T20 સિરીઝમાં પણ જેકોબ્સે 136 રન બનાવ્યા હતા. તે અત્યાર સુધી ન્યૂઝીલેન્ડ માટે 16 T20 આંતરરાષ્ટ્રીય મેચ રમી ચૂક્યો છે. જોકે, તેને હજુ વનડે અને ટેસ્ટ ક્રિકેટમાં ડેબ્યૂ કરવાની તક મળી નથી.