BCCIની ઉચ્ચ સ્તરીય સમીક્ષા બેઠક ગુરુવારે મુંબઈમાં યોજાઈ હતી, જેમાં 15 વર્ષીય ક્રિકેટર વૈભવ સૂર્યવંશીના ભવિષ્ય અંગે ચર્ચા કરવામાં આવી હતી. આ બેઠકમાં મુખ્ય કોચ ગૌતમ ગંભીર, શ્રેયસ અય્યર, શુભમન ગિલ અને સેન્ટર ઓફ એક્સેલન્સના વડા વીવીએસ લક્ષ્મણ હાજર રહ્યા હતા.
બેઠક બાદ BCCI સચિવ દેવજીત સૈકિયાએ જણાવ્યું કે બોર્ડ વૈભવની કારકિર્દી પર નજીકથી નજર રાખી રહ્યું છે. તેમણે કહ્યું, "અમે તેને ગંભીરતાથી લઈ રહ્યા છીએ. અમારી પ્રાથમિકતા તેની પાસેથી તાત્કાલિક પરિણામ લેવાની નથી, પરંતુ લાંબા ગાળાના ભવિષ્યને સુરક્ષિત કરવાની છે."
સૈકિયાએ વધુમાં જણાવ્યું કે BCCIને નથી જોઈતું કે વૈભવ ફક્ત એક-બે સિરીઝ કે એક વર્ષ માટે સમાચારમાં રહે. બોર્ડ તેને સચિન તેંડુલકર જેવી લાંબી કારકિર્દી માટે તૈયાર કરવા માંગે છે. આ માટે તેની દરેક કામગીરી અને તાલીમ પર દેખરેખ રાખવામાં આવી રહી છે.
સૈકિયાએ એમ પણ કહ્યું કે બોર્ડ ફક્ત વૈભવ પર જ નહીં, પરંતુ તેની ઉંમર જૂથના 10થી 15 ખેલાડીઓ પર નજર રાખી રહ્યું છે. વીવીએસ લક્ષ્મણ તેમની તાલીમ અને કૌશલ્ય વિકાસ પર કામ કરી રહ્યા છે.
હાલમાં વૈભવ અફઘાનિસ્તાન સામેની ટી20 સિરીઝ માટે ભારતીય ટીમનો ભાગ છે. આ સિરીઝ 13 સપ્ટેમ્બરથી શરૂ થશે. તે પહેલાં દુલીપ ટ્રોફીની ફાઇનલમાં તેની ટીમ પૂર્વ ઝોન પહોંચી છે. સૈકિયાએ જણાવ્યું કે ગૌતમ ગંભીર નક્કી કરશે કે વૈભવ દુલીપ ટ્રોફીમાં રમશે કે નહીં.