ભૂતપૂર્વ ભારતીય કેપ્ટન રોહિત શર્માએ IPL 2026 બાદ હેમસ્ટ્રિંગની ઈજામાંથી સાજા થવા માટે બેંગલુરુના સેન્ટર ઑફ એક્સિલન્સ (CoE)માં રિહેબ કર્યો હતો, પરંતુ BCCIએ તેની માહિતી જાહેર કરી નહોતી. આ દાવો ટાઈમ્સ ઓફ ઈન્ડિયાએ CoEના વાર્ષિક અહેવાલને ટાંકીને કર્યો છે.
એપ્રિલ 2025થી માર્ચ 2026 દરમિયાન ટીમ ઈન્ડિયાના 32 ક્રિકેટરોએ CoEમાં રિહેબ કર્યો છે. તેમાં BCCIના 20 સેન્ટ્રલ કોન્ટ્રાક્ટ ધરાવતા અને 12 ટાર્ગેટેડ/ઈન્ડિયા-A કેટેગરીના ખેલાડીઓ સામેલ છે. BCCIનું સેન્ટર ઑફ એક્સિલન્સ બેંગલુરુમાં સ્થિત છે, જ્યાં ખેલાડીઓનું રિહેબ અને ટ્રેનિંગ થાય છે.
ખેલાડીઓને થયેલી ઇજાઓમાં એકમાત્ર ગંભીર મામલો (ઇમ્પેક્ટ ઇન્જરી) રિષભ પંતનો હતો. જુલાઈ 2025માં ઇંગ્લેન્ડના માન્ચેસ્ટરમાં રમાયેલી ટેસ્ટ મેચ દરમિયાન તેના પગનું હાડકું તૂટી ગયું હતું (ફ્રેક્ચર). તે સાજા થવા માટે CoE પહોંચ્યો હતો. બાકીના ખેલાડીઓને મોટાભાગે સ્નાયુઓમાં ખેંચાણ અથવા તણાવ (સોફ્ટ-ટિશ્યૂ ઇન્જરી) જેવી સમસ્યાઓ જ થઈ હતી.
23 જુલાઈ 2025ના રોજ માન્ચેસ્ટરમાં ઇંગ્લેન્ડ સામેની પાંચમી ટેસ્ટ દરમિયાન ઇજાગ્રસ્ત થયા બાદ પંતને મેદાનની બહાર જવું પડ્યું હતું. બાદમાં તેણે અડધી સદી પણ ફટકારી હતી.
હાર્દિક પંડ્યા, હર્ષિત રાણા અને નીતિશ કુમાર રેડ્ડીએ છેલ્લા 18 મહિનામાં ઓછામાં ઓછા 4-4 મહિના CoEમાં વિતાવ્યા. અહેવાલ મુજબ, ત્રણેય ખેલાડીઓ વારંવાર ઈજાગ્રસ્ત થવાને કારણે રિહેબ માટે પહોંચ્યા હતા. તેમના સિવાય જસપ્રીત બુમરાહ, વોશિંગ્ટન સુંદર અને પ્રસિદ્ધ ક્રિષ્ના પણ વારંવાર ઈજાઓથી ઝઝૂમતા ખેલાડીઓમાં સામેલ છે.
30 સપ્ટેમ્બર સુધી ભારતીય ખેલાડીઓની યાદીમાં વિરાટ કોહલી, વરુણ ચક્રવર્તી, પ્રિન્સ યાદવ અને હર્ષ દુબેના નામ પણ સામેલ હતા. જોકે, અહેવાલમાં એ જણાવવામાં આવ્યું નથી કે દરેક ખેલાડી કેટલી વાર CoE પહોંચ્યો. હાર્દિકે આ જ વર્ષે માર્ચમાં T20 વર્લ્ડ કપમાં છેલ્લી વાર ભારત માટે રમ્યો હતો.
IPL 2026 પછી CoEમાં રિહેબ કરાવનારા ખેલાડીઓની સંખ્યા વધી છે. ત્યારથી દરેક સિરીઝમાં ઓછામાં ઓછા બે ખેલાડીઓ ઈજાગ્રસ્ત થવાની વાત કહેવામાં આવી છે. CoEની સ્પોર્ટ્સ સાયન્સ એન્ડ મેડિસિન (SSM) ટીમે એપ્રિલ 2025થી માર્ચ 2026 દરમિયાન મહિલા અને પુરુષ મળીને કુલ 68 ખેલાડીઓની ઈજાઓની સારવાર અને મેનેજમેન્ટ કર્યું.
BCCIએ CoE માટે 2026-27નો અંદાજિત ખર્ચ વધારીને ₹127 કરોડ કર્યો છે, જે ગયા નાણાકીય વર્ષમાં ₹92 કરોડ હતો. બજેટમાં આશરે ₹35 કરોડનો વધારો થયો છે. CoEના ખર્ચમાં વહીવટી ખર્ચ, કોર્સ અને મેચો સંબંધિત ખર્ચ પણ સામેલ છે.
2021-22માં કોવિડ-19 મહામારી દરમિયાન બાયો-બબલમાંથી બહાર આવ્યા બાદ સોફ્ટ-ટિશ્યૂ ઇજાના કેસોમાં વધારો થયો હતો. તે સમયે બે-ત્રણ મહિનામાં પરિસ્થિતિ પર કાબૂ મેળવી લેવામાં આવ્યો હતો. 2017માં સ્ટ્રેન્થ એન્ડ કન્ડિશનિંગ કોચ શંકર બાસુના ફિટનેસ પ્રોગ્રામમાં મોટા ફેરફારો થયા બાદ પણ લગભગ ત્રણ મહિના સુધી ઘણા ખેલાડીઓ ઈજાગ્રસ્ત થયા હતા.
CoEમાં સ્પોર્ટ્સ સાયન્સ એન્ડ મેડિસિન (SSM) પ્રમુખનું પદ માર્ચ 2025માં નિતિન પટેલના રાજીનામા બાદથી ખાલી છે. BCCIએ ગયા મહિને આ પદ માટે જાહેરાત બહાર પાડી હતી. ટીમ ઈન્ડિયાની SSM ટીમ અને CoEની SSM ટીમ વચ્ચે સંવાદનો અભાવ રહ્યો છે. ક્રિકેટ હેડ વીવીએસ લક્ષ્મણ બંને ટીમ વચ્ચે સંવાદનું માધ્યમ બન્યા છે.
ટીમ ઈન્ડિયાના સ્ટ્રેન્થ એન્ડ કન્ડિશનિંગ (S&C) કોચ એડ્રિયન લે રુએ જૂન 2025માં ખેલાડીઓના વર્કલોડ મેનેજમેન્ટમાં કેટલાક ફેરફારો સૂચવ્યા હતા. CoE પોતાની વર્તમાન વ્યવસ્થામાંથી બહાર આવવા તૈયાર દેખાયું નથી. CoEની SSM ટીમના સભ્યો ઇજાઓથી બચાવ અને તેના મેનેજમેન્ટ હેઠળ ડોમેસ્ટિક ટુર્નામેન્ટોમાં પણ ખેલાડીઓ પર નજર રાખવા પહોંચ્યા હતા.