બંગાળની ખાડીમાં ફરી એકવાર ચક્રવાત સક્રિય થઈ રહ્યું છે. ભારતીય હવામાન વિભાગ (IMD)ના જણાવ્યા મુજબ, બંગાળની ખાડીના પૂર્વ-મધ્ય અને તેની નજીકના દક્ષિણ-પૂર્વ વિસ્તારમાં શુક્રવારે સવારે 5:30 વાગ્યાની આસપાસ લો-પ્રેશર સિસ્ટમ સર્જાઈ છે.
આ સિસ્ટમ ઝડપથી મજબૂત થઈને સોમવાર, 26 ઓક્ટોબર 2026ની સવાર સુધીમાં પશ્ચિમ-મધ્ય બંગાળની ખાડીમાં ચક્રવાતી તોફાનમાં ફેરવાઈ શકે છે. વિશાખાપટ્ટનમ સ્થિત IMDના સાયક્લોન વોર્નિંગ સેન્ટરે આ અંગેની માહિતી આપી છે.
વાવાઝોડાની ટાઈમલાઈન
24 ઓક્ટોબર: સિસ્ટમ તે જ વિસ્તારમાં વધુ સક્રિય થઈને ડિપ્રેશનમાં ફેરવાશે.
25 ઓક્ટોબર: પશ્ચિમ-ઉત્તરપશ્ચિમ તરફ આગળ વધીને ડીપ ડિપ્રેશન બનશે.
26 ઓક્ટોબર: સિસ્ટમ વધુ ઉગ્ર બનીને ચક્રવાતી તોફાનનું રૂપ ધારણ કરશે.
લેન્ડફોલ ક્યાં થઈ શકે?
વિશાખાપટ્ટનમ સાયક્લોન વોર્નિંગ સેન્ટરના વડા પી. એલ. એન. મૂર્તિએ જણાવ્યું કે જો સિસ્ટમ આ જ રીતે મજબૂત થતી રહેશે, તો તે મછલીપટ્ટનમ અને વિશાખાપટ્ટનમ વચ્ચેના દરિયાકાંઠે ત્રાટકી શકે છે. યુરોપિયન સેન્ટર ફોર મીડિયમ-રેન્જ વેધર ફોરકાસ્ટ્સના મોડેલો દર્શાવે છે કે 27 ઓક્ટોબર સુધીમાં આંધ્ર પ્રદેશમાં અત્યંત ભારે વરસાદ થશે.
જોકે, વૈશ્વિક મોડેલોમાં સિસ્ટમની તીવ્રતા અંગે મતભેદ છે. કેટલાક મોડેલો તેને 'વેરી સિવિયર સાયક્લોનિક સ્ટોર્મ' દર્શાવે છે, જ્યારે AI-આધારિત હવામાન મોડેલો તેને સામાન્ય ચક્રવાતી તોફાન ગણાવે છે. એટલે કે વાવાઝોડાની અંતિમ તીવ્રતા હજુ સ્પષ્ટ નથી.
આંધ્ર પ્રદેશમાં 7 જિલ્લામાં અતિભારે વરસાદનું એલર્ટ
IMDના અમરાવતી કેન્દ્રએ 27 અને 28 ઓક્ટોબર માટે દરિયાકાંઠાના વિસ્તારોમાં ભારેથી અતિભારે વરસાદનું વિશેષ એલર્ટ આપ્યું છે. અલુરી સીતારામ રાજુ (ASR), કાકીનાડા, પૂર્વ ગોદાવરી, ડૉ. બી.આર. આંબેડકર કોનાસીમા, એલુરુ, પશ્ચિમ ગોદાવરી, એનટીઆર જિલ્લા અને યાનમમાં છૂટાછવાયા સ્થળોએ અતિભારે વરસાદની ચેતવણી છે. વિશાખાપટ્ટનમ સહિત અન્ય 10 જિલ્લામાં ભારે વરસાદ માટે વોચ એલર્ટ જારી કરાયું છે.
શનિવારે કોસ્ટલ આંધ્ર અને રાયલસીમા વિસ્તારમાં વીજળીના કડાકા સાથે 30થી 40 કિમી પ્રતિ કલાકની ઝડપે ભારે પવન ફૂંકાઈ શકે છે.
નાગરિકો માટે સૂચના
આંધ્ર પ્રદેશ સ્ટેટ ડિઝાસ્ટર મેનેજમેન્ટ ઓથોરિટીના મેનેજિંગ ડિરેક્ટર પ્રખર જૈને જણાવ્યું કે રાજ્યભરમાં વ્યાપક વરસાદ થશે. ખેડૂતો અને સામાન્ય લોકોએ સાવચેતી રાખવી જોઈએ. દરિયામાં ગયેલા માછીમારોએ કોઈ વિલંબ વિના તાત્કાલિક કિનારે પરત ફરવું જોઈએ.
નેલ્લોર અને પ્રકાશમમાં પાણી ભરાયા
ચક્રવાતી પરિભ્રમણની શરૂઆતી અસર ગુરુવારથી જ દેખાઈ હતી. નેલ્લોર અને પ્રકાશમ જિલ્લામાં ભારે વરસાદ પડ્યો, નીચાણવાળા વિસ્તારો પાણીમાં ગરકાવ થઈ ગયા અને ટ્રાફિક જામ સર્જાયો. તિરૂપતિ જિલ્લાના થોટ્ટમ્બેડુમાં 40.2 મીમી અને નેલ્લોરના રાપુરમાં 40 મીમી વરસાદ નોંધાયો. નેલ્લોરમાં 22 મીમી, કાવલીમાં 15 મીમી અને કુડ્ડપાહમાં 13 મીમી વરસાદ પડ્યો.