બંગાળની ખાડીમાં લો પ્રેશર સિસ્ટમ સક્રિય થઈ છે. હવામાન વિભાગ (IMD)ના જણાવ્યા અનુસાર, આ સિસ્ટમ 14 નવેમ્બરે વધુ મજબૂત બનીને 15 નવેમ્બર સુધીમાં ડિપ્રેશનમાં ફેરવાઈ શકે છે. ત્યારબાદ તે ઉત્તર-પશ્ચિમ દિશામાં આગળ વધીને 16 નવેમ્બરની સાંજ આસપાસ મધ્ય બંગાળની ખાડી પર ચક્રવાતી વાવાઝોડાનું રૂપ ધારણ કરી શકે છે. છેલ્લા કેટલાક દિવસોમાં આ ત્રીજું વાવાઝોડું હશે.
આ વાવાઝોડાની અસરથી દેશના અનેક રાજ્યોમાં ભારે વરસાદ અને તોફાની પવનની ચેતવણી આપવામાં આવી છે. દક્ષિણ ભારતમાં તમિલનાડુ, પુડુચેરી, કરાઈકલ, કેરળ, માહે, લક્ષદ્વીપ, દરિયાકાંઠાના આંધ્રપ્રદેશ, યનમ અને રાયલસીમામાં 13થી 19 નવેમ્બર દરમિયાન વરસાદની આગાહી છે. 15 નવેમ્બરે તમિલનાડુ, પુડુચેરી અને કરાઈકલમાં તથા 16થી 19 નવેમ્બર દરમિયાન કેરળ અને માહેમાં અતિભારે વરસાદની શક્યતા છે. 18 અને 19 નવેમ્બરે દરિયાકાંઠાના આંધ્રપ્રદેશ અને યનમમાં ભારે વરસાદ પડી શકે છે.
પૂર્વ ભારત અને ટાપુ વિસ્તારોમાં પણ 13થી 19 નવેમ્બર દરમિયાન આંદામાન અને નિકોબાર ટાપુઓ પર વ્યાપકથી ભારે વરસાદની આગાહી છે. 13થી 16 નવેમ્બર વચ્ચે વરસાદનું જોર વધુ રહેશે. અહીં 13થી 17 નવેમ્બર દરમિયાન ગાજવીજ, વીજળીના કડાકા અને તેજ પવન સાથે વરસાદ પડશે. 18 અને 19 નવેમ્બરે પણ તેજ પવન ચાલુ રહેશે. ગંગાના મેદાની પશ્ચિમ બંગાળ અને ઓડિશામાં 18-19 નવેમ્બરે વરસાદ પડશે, જેમાં ઓડિશામાં ભારે વરસાદ અને 19 નવેમ્બરે પશ્ચિમ બંગાળમાં તોફાની પવનની આગાહી છે.
ઉત્તર-પશ્ચિમ ભારતમાં પણ હવામાનમાં પલટો જોવા મળશે. 13 નવેમ્બરે જમ્મુ-કાશ્મીર અને લદ્દાખમાં વ્યાપક વરસાદ પડશે, જ્યારે 14-15 નવેમ્બરે જમ્મુ-કાશ્મીર, લદ્દાખ તેમજ 13થી 15 નવેમ્બર દરમિયાન હિમાચલ પ્રદેશ અને ઉત્તરાખંડમાં છૂટોછવાયો વરસાદ નોંધાશે. મેદાની વિસ્તારોમાં 13-14 નવેમ્બરે હરિયાણા, ચંદીગઢ, દિલ્હી અને પંજાબમાં ભારે વરસાદની શક્યતા છે. 14-15 નવેમ્બર દરમિયાન પશ્ચિમ રાજસ્થાન અને પશ્ચિમ ઉત્તર પ્રદેશમાં તથા 15 નવેમ્બરે પૂર્વ રાજસ્થાનમાં વરસાદ પડી શકે છે.
હવામાન વિભાગે ચેતવણી જારી કરી છે અને લોકોને સાવચેત રહેવા અપીલ કરી છે. વાવાઝોડાની તીવ્રતા અને માર્ગ અંગે વધુ માહિતી આગામી દિવસોમાં અપડેટ થશે.