બાંગ્લાદેશના પૂર્વ એરફોર્સ અધિકારી તહસિફ સૌરીનો મૃતદેહ ઢાકાની તુરાગ નદીમાંથી શંકાસ્પદ સંજોગોમાં મળી આવ્યો છે. 28 વર્ષીય સૌરી 27 ઑક્ટોબરથી ગુમ હતા. તેમના પરિવારે હત્યાનો આરોપ લગાવ્યો છે અને દાવો કર્યો છે કે શેખ હસીનાનો દેશ છોડવાનો વીડિયો શેર કરવા બદલ તેમને હેરાન કરવામાં આવતા હતા. પોલીસે હજુ પોસ્ટમોર્ટમ રિપોર્ટની રાહ જોઈ રહી છે.
બાંગ્લાદેશના પૂર્વ વડાપ્રધાન શેખ હસીના દેશ છોડીને જતા હોવાનો વીડિયો વાયરલ થયા બાદ ચર્ચામાં આવેલા ફ્લાઇટ લેફ્ટનન્ટ તહસિફ સૌરીનું મોત શંકાસ્પદ રીતે થયું છે. 28 વર્ષીય સૌરીનો મૃતદેહ ઢાકાની તુરાગ નદીમાંથી મળી આવ્યો છે. પરિવારનો આરોપ છે કે શેખ હસીનાનો વીડિયો શેર કરવાના કારણે તેમને સતત હેરાન કરવામાં આવી રહ્યા હતા.
બાંગ્લાદેશ વાયુસેનાના ફ્લાઇટ લેફ્ટનન્ટ તહસિફ સૌરી 27 ઑક્ટોબરની સાંજે ઘરથી બહાર ગયા હતા અને પાછા ફર્યા ન હતા. રાત્રે 1:35 વાગ્યે તેમણે પોતાની માતાને મેસેજ મોકલ્યો હતો કે, 'મમ્મી, હું આવી રહ્યો છું.' ત્યારબાદ પરિવારજનો તેમનો સંપર્ક કરી શક્યા ન હતા. ગુરુવારે નદીમાંથી મૃતદેહ મળી આવ્યા બાદ પરિવારે આક્ષેપ કર્યો છે કે, ઑગસ્ટ 2024માં જ્યારે શેખ હસીના સૈન્ય વિમાનમાં દેશ છોડીને જઈ રહ્યા હતા, ત્યારનો વીડિયો શેર કરવાના કારણે તેમને માનસિક ત્રાસ આપવામાં આવી રહ્યો હતો.
બાંગ્લાદેશના ઇન્ટર-સર્વિસીસ પબ્લિક રિલેશન્સ (ISPR)ના જણાવ્યા અનુસાર, સૌરીને 4 ઑગસ્ટ 2025ના રોજ નિયમો અનુસાર નિવૃત્ત કરવામાં આવ્યા હતા અને તેમના પર કોઈ સત્તાવાર આરોપ નહોતો. જોકે, તેમના સ્વજનો અને પૈતૃક બહેન મોશફેકા જહાંએ ફેસબુક પર પોસ્ટ કરીને દાવો કર્યો છે કે વીડિયો શેર કરવાના કારણે તેમની હત્યા કરવામાં આવી છે. ઉત્તારખાન પોલીસ સ્ટેશને જણાવ્યું છે કે પોસ્ટમોર્ટમ રિપોર્ટ આવ્યા બાદ જ મોતનું સાચું કારણ - ડૂબી જવાથી, આત્મહત્યા કે હત્યા - જાણી શકાશે.