ઉત્તર પ્રદેશના બલરામપુર જિલ્લાના ચરણગહિયા-બેલહા ગામમાં શનિવારે રાત્રે એક ગંભીર માર્ગ અકસ્માત થયો. દુર્ગા મંદિરની બહાર વીડિયો જોઈ રહેલા લોકો પર એક કાર ચઢી જતાં ત્રણ લોકોના મોત થયા અને ચાર ગંભીર રીતે ઈજાગ્રસ્ત થયા. પોલીસે કાર કબજે કરી ડ્રાઈવરની અટકાયત કરી છે. ડ્રાઈવર નશામાં હોવાની આશંકા છે, પરંતુ તેની સત્તાવાર પુષ્ટિ તબીબી તપાસ પછી જ થશે.
ઘટના રાત્રે લગભગ 11 વાગે બની. મંદિરમાં આરતી પૂરી થયા બાદ કેટલાક ગ્રામજનો રસ્તાની બાજુમાં ટેન્ટ લગાવીને મોબાઈલ કે અન્ય માધ્યમથી વીડિયો જોઈ રહ્યા હતા. તે સમયે ગૌરા ચોરાહા તરફ જતી એક અનિયંત્રિત કાર ટેન્ટનો ભાગ તોડીને ત્યાં બેઠેલા લોકો પર ચઢી ગઈ.
અકસ્માતમાં પાટેશ્વરી પ્રસાદ ઉર્ફે મહેતા પ્રસાદ (42), મનોજ સિંહ (51) અને ગણેશ પાંડે (45)ના મોત થયા. છેદીરામ (50), ઘોપરામ (31), ડબ્લુ (37) અને મુકેશ તિવારી (30) ગંભીર રીતે ઈજાગ્રસ્ત થયા. તમામ પીડિતો ચરણગહિયા-બેલહા ગામના રહેવાસી છે.
ઘટનાની જાણ થતાં જ પોલીસે ઈજાગ્રસ્તોને જિલ્લા મેમોરિયલ હોસ્પિટલ પહોંચાડ્યા. બે ઘાયલોની હાલત વધુ ગંભીર હોવાથી તેમને બેહરાઈચ રેફર કરવામાં આવ્યા છે, જ્યારે અન્યની સારવાર ચાલુ છે. સીઓ અભિષેક સિંહે જણાવ્યું કે પોલીસે કાર કબજે કરી ડ્રાઈવરને કસ્ટડીમાં લીધો છે.
આ ઘટનાથી મૃતકોના પરિવારજનોમાં ભારે આક્રંદ છવાયો છે અને સમગ્ર ગામમાં શોકનો માહોલ છે.