ATMમાંથી પૈસા ઉપાડતી વખતે ઘણી વાર એવું બને છે કે ખાતામાંથી રકમ કપાઈ જવાનો SMS આવી જાય છે, પણ મશીનમાંથી કેશ બહાર આવતું નથી. આ સ્થિતિને નિષ્ફળ ATM ટ્રાન્ઝેક્શન (Failed ATM Transaction) કહેવામાં આવે છે. આવા સમયે ગભરાવાની જરૂર નથી, કારણ કે RBIના નિયમો ગ્રાહકના હિતમાં છે.
RBIના નિયમ મુજબ, જો ATMમાંથી કેશ ન નીકળે અને ખાતામાંથી રકમ કપાઈ જાય, તો બેંકે ટ્રાન્ઝેક્શનની તારીખથી પાંચ કેલેન્ડર દિવસની અંદર આ રકમ ગ્રાહકના ખાતામાં પરત કરવી પડે છે. જો આ સમયમર્યાદામાં પૈસા પાછા ન મળે, તો ગ્રાહક બેંકમાં ફરિયાદ નોંધાવી શકે છે. વધુમાં, RBIની ફરિયાદ પ્રણાલી (Complaint Management System) દ્વારા પણ ફરિયાદ કરી શકાય છે અને લાગુ નિયમો હેઠળ વળતર મેળવવા હકદાર બને છે.
નિષ્ફળ ટ્રાન્ઝેક્શનના કિસ્સામાં સૌથી પહેલાં ટ્રાન્ઝેક્શન સાથે જોડાયેલી વિગતો સાચવી રાખવી જરૂરી છે. જેમ કે, ખાતામાંથી પૈસા કપાયાનો SMS, બેંક એપમાં દેખાતી ટ્રાન્ઝેક્શન ડિટેલ અથવા ATMની રસીદ. સાથે જ જે ATMમાંથી પૈસા ઉપાડવાનો પ્રયાસ કર્યો હતો તેનું લોકેશન, તારીખ અને સમય પણ નોંધી લેવો. ત્યારબાદ તમારી બેંકની મોબાઇલ એપ, નેટ બેંકિંગ અથવા કસ્ટમર કેરના માધ્યમથી વહેલામાં વહેલી તકે ફરિયાદ નોંધાવો અને ફરિયાદનો રેફરન્સ નંબર પણ સાચવી રાખો.
જો નિર્ધારિત પાંચ દિવસની અંદર રકમ પાછી ન મળે, તો પહેલાં બેંકમાં ફરિયાદ કર્યા બાદ RBIના Complaint Management System (CMS) દ્વારા ફરિયાદ નોંધાવી શકાય છે. નોંધનીય છે કે, નિર્ધારિત સમયમર્યાદા પૂરી થયા પછી પણ રકમ પાછી ન મળે તો RBIના નિયમો મુજબ ગ્રાહકને દિવસના ₹100 લેખે વળતર મળી શકે છે, જ્યાં સુધી રકમ ખાતામાં પાછી જમા ન થઈ જાય.