એશિયન ગેમ્સ 2026ની મહિલા ક્રિકેટ સેમિફાઇનલમાં ભારતે બાંગ્લાદેશ સામે ટોસ જીતીને પહેલા બેટિંગ કરવાનો નિર્ણય લીધો. નિર્ધારિત 20 ઓવરમાં ભારતે 4 વિકેટ ગુમાવીને 195 રન બનાવ્યા. બાંગ્લાદેશને જીત માટે 196 રનનો ટારગેટ મળ્યો છે.
ભારત માટે શેફાલી વર્માએ 49 બોલમાં અણનમ સદી ફટકારી. તેણે 20મી ઓવરના છેલ્લા બોલ પર એક રન લઈને પોતાની પ્રથમ વ્હાઇટ-બોલ ઇન્ટરનેશનલ સદી પૂરી કરી. આ સાથે તે એશિયન ગેમ્સમાં સદી ફટકારનારી પ્રથમ બેટર બની. શેફાલીએ 15મી ઓવરમાં મારુફા અખ્તરની ઓવરમાં સતત બે છગ્ગા અને એક ચોગ્ગો ફટકાર્યો, જેમાં 17 રન આવ્યા. તેણે 36 બોલમાં ફિફ્ટી પૂરી કરી હતી. 2026માં આ તેનો આઠમો 50થી વધુનો સ્કોર છે, જે સ્મૃતિ મંધાનાના 2024ના રેકોર્ડની બરાબરી છે.
ઓપનિંગમાં સ્મૃતિ મંધાનાએ 19 બોલમાં 37 રન બનાવ્યા, જેમાં 5 ચોગ્ગા અને 2 છગ્ગા સામેલ હતા. આ ઇનિંગ્સ દરમિયાન મંધાના મહિલા ટી-20 ઇન્ટરનેશનલમાં સૌથી વધુ રન બનાવનાર બેટ્સમેન બની ગઈ. તેના નામે હવે 4,788 રન છે, જેણે ન્યૂઝીલેન્ડની સુઝી બેટ્સ (4,758 રન)ને પાછળ ધકેલી દીધી. શેફાલી સાથે તેની 72 રનની ઓપનિંગ ભાગીદારી થઈ.
ત્યારબાદ જી કમલિની 10 બોલમાં 3 રન બનાવીને આઉટ થઈ. શાંજીદા અખ્તર મેઘલાએ તેને ડીપ મિડ-વિકેટ પર રાબેયા ખાનના હાથે કેચ કરાવ્યો. કેપ્ટન હરમનપ્રીત કૌરે 33 બોલમાં 40 રન બનાવ્યા, જેમાં 6 ચોગ્ગા સામેલ હતા. રાબેયા ખાને 18મી ઓવરમાં તેને સ્ટમ્પ આઉટ કર્યા. હરમન અને શેફાલી વચ્ચે ત્રીજી વિકેટ માટે 94 રનની ભાગીદારી થઈ. 19મી ઓવરમાં મારુફા અખ્તરે રિચા ઘોષને 4 બોલમાં 2 રન પર આઉટ કર્યા. ભારતે છેલ્લી ઓવરમાં 10 રન ઉમેર્યા અને 20 ઓવરમાં 195/4નો સ્કોર બનાવ્યો. ભારતી ફુલમાલી 5 બોલમાં 9 રન બનાવીને અણનમ રહી.
જવાબમાં બાંગ્લાદેશની ઇનિંગ્સની શરૂઆત ખરાબ રહી. પહેલી જ બોલ પર નંદની શર્માએ જુઆરિયા ફિરદૌસને ખાતું ખોલ્યા વિના આઉટ કરી. ફિરદૌસે કવર-પોઇન્ટ ઉપરથી શોટ રમ્યો, જ્યાં જી કમલિનીએ બીજા પ્રયાસમાં કેચ પકડ્યો. 6 ઓવરના અંતે બાંગ્લાદેશે 2 વિકેટ ગુમાવીને 39 રન બનાવ્યા છે. ભારત તરફથી નંદની શર્મા અને અન્ય બોલરોએ શરૂઆતમાં દબાણ જાળવી રાખ્યું છે.
ભારતની પ્લેઇંગ-11: શેફાલી વર્મા, સ્મૃતિ મંધાના, ભારતી ફુલમાલી, હરમનપ્રીત કૌર (કેપ્ટન), રિચા ઘોષ (વિકેટકીપર), જી કમલિની, દીપ્તિ શર્મા, શ્રેયંકા પાટિલ, શ્રી ચરણિ, નંદની શર્મા અને ક્રાંતિ ગૌડ.
બાંગ્લાદેશની પ્લેઇંગ-11: દિલારા અખ્તર, જુઆરીયા ફરદૂસ, શોભના મુસ્તારી, નિગાર સુલ્તાના (વિકેટકીપર/કેપ્ટન), શોર્ના અખ્તર, શર્મિન અખ્તર, શાંજીદા અખ્તર મેઘલા, રાબેયા ખાન, નાહિદા અખ્તર, મારુફા અખ્તર અને સુલ્તાના ખાતૂન.