જાપાનના આઈચી-નાગોયામાં યોજાયેલી એશિયન ગેમ્સમાં ભારતે કુલ 85 મેડલ જીત્યા છે, જેમાં 21 ગોલ્ડ, 30 સિલ્વર અને 34 બ્રોન્ઝનો સમાવેશ થાય છે. છેલ્લા દિવસે ઘોડેસવારીની બે ગોલ્ડ મેડલ ઇવેન્ટ્સ બાકી હતી, પરંતુ તેમાં કોઈ ભારતીય ખેલાડી ભાગ લઈ રહ્યો ન હોવાથી ભારતનું અભિયાન પૂર્ણ થઈ ગયું છે.
ઉઝબેકિસ્તાને પણ 21 ગોલ્ડ જીત્યા છે, પરંતુ ભારત કરતાં ઓછી સિલ્વર મેડલ હોવાથી ભારત ચોથા સ્થાને છે. જો રવિવારે ઉઝબેકિસ્તાન કોઈ વધારાનો ગોલ્ડ જીતે તો પણ ભારત ચોથા સ્થાને જ રહેશે.
2002માં બુસાનમાં યોજાયેલી એશિયન ગેમ્સ પછી પહેલી વાર ભારતની મહિલાઓએ પુરુષો કરતાં વધુ મેડલ જીત્યા છે. આ વખતે મહિલાઓની ઇવેન્ટમાં 11 ગોલ્ડ અને પુરુષોની ઇવેન્ટમાં 7 ગોલ્ડ મળ્યા છે, જ્યારે 3 ગોલ્ડ મિક્સ્ડ ઇવેન્ટમાં મળ્યા છે. 2002માં ભારતે મહિલાઓની ઇવેન્ટમાં 6 અને પુરુષોની ઇવેન્ટમાં 5 ગોલ્ડ જીત્યા હતા.
જો કે, 2023માં ચીનના ગ્વાંગઝૂમાં યોજાયેલી એશિયન ગેમ્સમાં ભારતે 28 ગોલ્ડ સાથે 106 મેડલ જીત્યા હતા. ત્યારે શૂટિંગમાં 7 અને એથ્લેટિક્સમાં 6 ગોલ્ડ મળ્યા હતા. આ વખતે શૂટિંગમાં 3 અને એથ્લેટિક્સમાં માત્ર 1 ગોલ્ડ મળ્યો, એટલે કે આ બે રમતોમાં જ ભારતને 9 ગોલ્ડનું નુકસાન થયું છે. સ્ક્વોશમાં 2 અને ટેનિસ, બેડમિન્ટન તથા ઘોડેસવારીમાં 1-1 ગોલ્ડ જીતનાર ભારતને આ રમતોમાં આ વખતે એક પણ ગોલ્ડ મળ્યો નથી.
બોક્સિંગ અને રેસલિંગમાં સારા પ્રદર્શનથી ગોલ્ડની કમી અમુક અંશે પૂરી થઈ છે. અગાઉ ભારતને આ બંને રમતોમાં એક પણ ગોલ્ડ મળ્યો નહોતો, પરંતુ આ વખતે બોક્સિંગમાં 3 અને રેસલિંગમાં 2 ગોલ્ડ મળ્યા છે. તીરંદાજીમાં ભારતે અગાઉના પ્રદર્શનનું પુનરાવર્તન કર્યું છે.
ટીમ ઇવેન્ટ્સમાં ભારતે શાનદાર પ્રદર્શન કર્યું છે. ક્રિકેટ, હૉકી અને કબડ્ડીમાં ભારતે પુરુષ અને મહિલા બંને વર્ગોમાં ગોલ્ડ મેડલ જીત્યા છે. હૉકીમાં એશિયાડ ગોલ્ડ જીતવા બદલ સીધી ઓલિમ્પિકની ટિકિટ મળે છે, તેથી ભારતની બંને હૉકી ટીમોએ લૉસ એન્જલસમાં યોજાનારા 2028 ઓલિમ્પિક્સ માટે ક્વૉલિફાય કરી લીધું છે. આ પ્રથમ વખત છે જ્યારે ભારતની બંને વર્ગોની હૉકી ટીમોએ એક જ ઇવેન્ટમાં ગોલ્ડ જીત્યો છે.
મેડલ ટેબલમાં ચીનનું વર્ચસ્વ 44 વર્ષથી યથાવત્ છે. ચીને આ વખતે 169 ગોલ્ડ સહિત 341 મેડલ જીત્યા છે. બીજા ક્રમે રહેલા જાપાને 83 ગોલ્ડ જીત્યા છે, જે ચીનના અડધાથી પણ ઓછા છે. ચીન 1982થી અત્યાર સુધીની દરેક એશિયન ગેમ્સમાં ટોચના સ્થાને રહ્યું છે.
ભારતે સ્થાનની દૃષ્ટિએ અગાઉની એશિયન ગેમ્સના પ્રદર્શનની બરાબરી કરી છે, પરંતુ આ વખતે 7 ગોલ્ડ સહિત કુલ 21 મેડલની કમી રહી છે.
આ એશિયન ગેમ્સમાં અલગ-અલગ ઇવેન્ટ્સમાં કુલ 53 વર્લ્ડ રેકોર્ડ અને 76 એશિયન રેકોર્ડ તૂટ્યા છે, સાથે જ 166 નવા ગેમ્સ રેકોર્ડ પણ બન્યા છે. ભારતીય મહિલા કમ્પાઉન્ડ તીરંદાજી ટીમે ફાઇનલમાં ચીન સામે 238 પોઈન્ટ્સ બનાવ્યા, જે વર્લ્ડ રેકોર્ડની બરાબરી છે. ચિકાથા તનિપાર્થી, પ્રથિકા પ્રદીપ અને જ્યોતિ સુરેખા વેન્નમની ત્રિપુટીએ ચીનને 238-234થી હરાવીને ગોલ્ડ જીત્યો હતો.