એશિયન ગેમ્સ 2026ના ચોથા દિવસે ભારતને 4 મેડલ મળ્યા છે. જેમાં વેઇટલિફ્ટર મીરાબાઈ ચાનુએ મહિલાઓની 49 કિલોગ્રામ વેઇટ કેટેગરીમાં સિલ્વર મેડલ જીત્યો છે. તેમણે કુલ 198 કિલોગ્રામ વજન ઉઠાવ્યું હતું. તેમણે સ્નેચમાં 87 કિલોગ્રામ અને ક્લીન એન્ડ જર્કમાં 111 કિલોગ્રામ વજન ઉઠાવ્યું હતું.
મીરાબાઈનો આ મેડલ ઘણો ખાસ છે. 1998 પછી પહેલી વાર ભારતને એશિયન ગેમ્સમાં વેઇટલિફ્ટિંગમાં મેડલ મળ્યો છે. 1998માં કર્ણમ મલ્લેશ્વરીએ મેડલ જીત્યો હતો. મીરાબાઈ પહેલા ઓલિમ્પિક, કોમનવેલ્થ ગેમ્સ અને વર્લ્ડ ચેમ્પિયનશિપમાં પણ મેડલ જીતી ચૂક્યા છે.
બુધવારે ભારતને બે મેડલ શોટગન શૂટિંગની સ્કીટ ઇવેન્ટમાં મળ્યા. મહિલા સ્કીટ ટીમ ઇવેન્ટમાં રાયજા ઢિલ્લોં, પરિનાઝ ધાલીવાલ અને માહેશ્વરી ચૌહાણની ત્રિપુટીએ 331 પોઇન્ટ સાથે ત્રીજું સ્થાન મેળવ્યું. પુરુષ સ્કીટ ટીમ ઇવેન્ટમાં અનંતજીત સિંહ નારુકા, મેરાજ અહમદ ખાન અને ભવતેગ સિંહ ગિલની ટીમે શૂટ-ઓફમાં કઝાકિસ્તાનને હરાવીને બ્રોન્ઝ મેડલ જીત્યો.
સોફ્ટ ટેનિસમાં પણ ભારતને પહેલો મેડલ મળ્યો. જય મીણાએ બ્રોન્ઝ મેડલ જીત્યો.
શૂટર મનુ ભાકર મહિલા 10 મીટર પિસ્તોલની વ્યક્તિગત ઇવેન્ટમાં 5મા સ્થાને રહ્યા. તેમણે ફાઇનલમાં 181.1 પોઇન્ટ મેળવ્યા હતા. ટીમ ઇવેન્ટમાં ભારત બ્રોન્ઝ મેડલથી ચૂકી ગયું. મનુ, ઈશા અને સુરુચિએ મળીને 1719 પોઇન્ટ મેળવ્યા, જે વિયેતનામની ટીમના પોઇન્ટ જેટલા જ હતા. પરંતુ વિયેતનામની શૂટર્સે 46 પરફેક્ટ 10 ફટકાર્યા હતા, જ્યારે ભારતીય શૂટર્સે 44. આથી ભારતને બ્રોન્ઝ મળ્યો નહીં. આ ઇવેન્ટમાં ચીન ગોલ્ડ અને દક્ષિણ કોરિયા સિલ્વર મેડલ જીત્યા.
અનંતજીત સિંહ નારુકા પુરુષ સ્કીટ ઇવેન્ટમાં ચોથા સ્થાને રહ્યા. તેમણે છેલ્લી શ્રેણીમાં ચારેય શોટ ટાર્ગેટ પર લગાવ્યા હતા, પરંતુ પહેલાના બે મિસ ભારે પડ્યા. તેઓ 35માંથી માત્ર 25 શોટ જ નિશાન પર લગાવી શક્યા.
બેડમિન્ટનમાં સાત્વિકસાઈરાજ રંકીરેડ્ડી અને ચિરાગ શેટ્ટીએ પુરુષ ટીમ સેમિફાઇનલમાં ચીન સામે ભારતને 1-1ની બરાબરી અપાવી. તેમણે લિયાંગ વેઇકૅંગ-વાંગ ચાંગની જોડીને 21-11, 22-20થી હરાવ્યા.
મહિલા હોકીમાં ભારતે થાઈલેન્ડને 20-1થી હરાવ્યું. આ ભારતની સતત ત્રીજી મોટી જીત છે. પહેલા ભારતે ઉઝબેકિસ્તાનને 19-0 અને ઇન્ડોનેશિયાને 17-1થી હરાવ્યું હતું. થાઈલેન્ડ સામે દીપિકાએ 9 ગોલ, નવનીતે 4, રુતુજાએ 3 અને લાલરેમસિયામી, નેહા, સાક્ષી તથા સલીમાએ 1-1 ગોલ કર્યો.
કબડ્ડીમાં ભારતીય પુરુષ ટીમે બાંગ્લાદેશને 48-25થી હરાવ્યું. વેઇટલિફ્ટિંગમાં જ્ઞાનેશ્વરી યાદવે મહિલાઓની 53 કિલોગ્રામ કેટેગરીમાં સ્નેચના પ્રથમ પ્રયાસમાં 84 કિલોગ્રામ વજન સફળતાપૂર્વક ઉઠાવ્યું.