એશિયન ગેમ્સ 2026ની મહિલા ક્રિકેટ સ્પર્ધાના ક્વાર્ટર ફાઇનલમાં ભારતે જાપાન સામે ટૉસ જીતીને પહેલા બોલિંગ કરવાનો નિર્ણય લીધો. જાપાનની ટીમ 19.5 ઓવરમાં 57 રન પર ઓલઆઉટ થઈ ગઈ. હવે ભારતને જીત માટે 58 રનનો ટાર્ગેટ મળ્યો છે.
ભારત તરફથી શ્રી ચરણીએ સૌથી વધુ 4 વિકેટ ઝડપી. શેફાલી વર્માએ 2 વિકેટ લીધી, જ્યારે દીપ્તિ શર્માએ 1 વિકેટ મેળવી. જાપાન માટે અયાકા કાટો-સ્ટાફોર્ડે 25 રન અને શિમાકો કાટોએ 4 રન બનાવ્યા.
ઉલ્લેખનીય છે કે ભારત ડિફેન્ડિંગ ચેમ્પિયન છે. ટીમે 2023 એશિયન ગેમ્સમાં ગોલ્ડ મેડલ જીત્યો હતો. આ ઉપરાંત ટીમ આઠમી વખત મહિલા એશિયા કપ જીતીને અહીં પહોંચી છે.
પ્લેઇંગ-11
ભારત: હરમનપ્રીત કૌર (કેપ્ટન), સ્મૃતિ મંધાના, શેફાલી વર્મા, ભારતી ફુલમાળી, રિચા ઘોષ (વિકેટકીપર), દીપ્તિ શર્મા, જી કમલિની, શ્રેયંકા પાટીલ, શ્રી ચરણી, નંદની શર્મા અને ક્રાંતિ ગૌડ.
જાપાન: હરુના ઇવાસાકી, અકારી નિશિમોરા કાનો (વિકેટકીપર), માઈ યાનાગીડા (કેપ્ટન), એરિકા ઓડા, અહિલ્યા ચંદેલ, શિમાકો કાતો, અકાયા કાતો-સ્ટેફોર્ડ, અયૂમી ફૂજીકાવા, હિનાસે ગોતો, એરિકા તોગુચી ક્વિન અને નોનોહા યાસુમોટો.
લાઈવ અપડેટ્સ
જાપાનની છઠ્ઠી વિકેટ પડી: 16.4 ઓવરમાં હિનાસે ગોતો 1 રન બનાવીને રન આઉટ થઈ ગઈ. શેફાલી વર્માના બોલ પર ગોતોએ સ્વીપ શોટ રમ્યો અને બોલ ફાઇન લેગ તરફ ગયો. બંને બેટર્સે બીજો રન લેવાનો પ્રયાસ કર્યો, પરંતુ સ્મૃતિ મંધાનાએ ઝડપથી થ્રો કર્યો અને રિચા ઘોષે બોલ પકડીને ગોતોને રન આઉટ કરી દીધી.
શેફાલીને બીજી વિકેટ: 16.3 ઓવરમાં શિમાકો કાટો 4 રન બનાવીને આઉટ થઈ. શેફાલી વર્માએ શોર્ટ બોલ નાખ્યો, જેના પર કાટોએ પુલ શોટ રમવાનો પ્રયાસ કર્યો. બોલની ટોપ એજ લાગી અને મિડ-ઓફ પર હરમનપ્રીત કૌરે આગળની તરફ ડાઇવ લગાવીને કેચ પકડ્યો. આ મેચમાં શેફાલીની આ બીજી વિકેટ હતી.
જાપાનની ચોથી વિકેટ પડી: જાપાને 15 ઓવરમાં 47 રન પર 4 વિકેટ ગુમાવી દીધી છે. શેફાલી વર્માએ ભારતને ચોથી સફળતા અપાવી. તેણે અયાકા કાટો-સ્ટાફોર્ડને 25 રન પર આઉટ કરી. કાટોએ મિડ-ઑનના ઉપરથી શોટ રમવાનો પ્રયાસ કર્યો, પરંતુ કમલિનીએ કેચ પકડી લીધો.
દીપ્તિ શર્માને પહેલી વિકેટ: જાપાને 12 ઓવરમાં 33 રન પર 3 વિકેટ ગુમાવી દીધી છે. ભારતની દીપ્તિ શર્માએ પોતાની બીજી ઓવર શાનદાર રીતે પૂરી કરી અને એરિકા ઓડાને 5 રન પર આઉટ કરી દીધી. ઓડાએ લોફ્ટેડ શોટ રમ્યો, પરંતુ ડીપ મિડવિકેટ પર શ્રેયંકા પાટીલે તેનો કેચ પકડી લીધો. આ ઓવરમાં જાપાનને માત્ર 1 રન મળ્યો. દીપ્તિ શર્માએ 2 ઓવરમાં 4 રન આપીને 1 વિકેટ લીધી છે.
10 ઓવર પછી જાપાનનો સ્કોર 30/2: જાપાને 10 ઓવરમાં 30 રન પર 2 વિકેટ બનાવી છે. એરિકા ઓડા 4 રન અને અયાકા કાટો-સ્ટાફોર્ડ 12 રન બનાવીને ક્રિઝ પર છે. ભારત તરફથી દીપ્તિ શર્માએ પોતાની પહેલી ઓવર ફેંકી અને 3 રન આપ્યા.
સાતમી ઓવરમાં જાપાનની 2 વિકેટ પડી: જાપાને 7 ઓવરમાં 24 રન પર 2 વિકેટ ગુમાવી દીધી છે. ભારતની શ્રી ચરણીએ એક જ ઓવરમાં બે વિકેટ લઈને જાપાનને મોટો ઝટકો આપ્યો. તેણે 6.2 ઓવરમાં હારુના ઇવાસાકીને શેફાલી વર્માના હાથે કેચ કરાવી. ત્યારબાદ તેના પછીના જ બોલ પર માઈ યાનાગિદાને વિકેટકીપર રિચા ઘોષના હાથે કેચ કરાવીને પેવેલિયન ભેગા કરી. ચરણીએ પોતાની 2 ઓવરમાં 9 રન આપીને 2 વિકેટ લીધી છે.
જાપાને 4 ઓવરમાં 12 રન બનાવ્યા: જાપાને 4 ઓવરમાં 12 રન બનાવ્યા છે. અકારી નિશિમુરા 4 રન અને હારુના ઇવાસાકી 5 રન બનાવીને ક્રિઝ પર છે. ભારત તરફથી નંદિની શર્મા અને ક્રાંતિ ગૌડે 2-2 ઓવર બોલિંગ કરી છે.
ભારતે ટૉસ જીત્યો: ભારતે ટૉસ જીતીને પહેલા બોલિંગ કરવાનો નિર્ણય લીધો છે. ભારતીય ટીમ એશિયન ગેમ્સ 2026ના ક્વાર્ટર ફાઇનલમાં જાપાન સામે મેદાનમાં ઉતરી છે.
શેફાલી અને ચરણી આ વર્ષે ટીમની ટોપ પર્ફોર્મર: એશિયા કપમાં સૌથી વધુ રન બનાવનારી શેફાલી વર્મા આ વર્ષે ટીમની ટોપ રન સ્કોરર પણ છે. તેણે 2026માં 21 ટી-20 મેચમાં 675 રન બનાવ્યા છે. બીજી તરફ બોલિંગમાં શ્રી ચરણીએ આ વર્ષે 20 મેચમાં 39 વિકેટ લીધી છે. તેની ઇકોનોમી 6.10 રહી છે.
જાપાનને 16 વર્ષીય ઓલરાઉન્ડર અયાકા પાસેથી આશાઓ: 16 વર્ષીય અયાકા કાટો-સ્ટાફોર્ડે આ વર્ષે બોલિંગ અને બેટિંગ બંનેમાં ઉત્કૃષ્ટ પ્રદર્શન કર્યું છે. તેણે 5 T20 મેચમાં ટીમ માટે સૌથી વધુ 223 રન બનાવ્યા છે. સાથે જ તેણે 8 વિકેટ લીધી છે. તેની ઇકોનોમી 4.22 રહી છે.
ક્વાર્ટર ફાઇનલથી શરૂ થઈ રહી છે ટુર્નામેન્ટ: એશિયન ગેમ્સની વુમન્સ ક્રિકેટ સ્પર્ધામાં ગ્રુપ સ્ટેજ નથી. આઠ ટીમોની ટુર્નામેન્ટ સીધી ક્વાર્ટર ફાઇનલથી શરૂ થાય છે.