એશિયન ગેમ્સ 2026માં શુક્રવારે ભારત માટે ઐતિહાસિક દિવસ રહ્યો. બપોરે 3:08 વાગ્યે બોક્સર અંકુશ પંઘાલે પુરુષોની 80 કિગ્રા વેઇટ કેટેગરીની ફાઇનલમાં દક્ષિણ કોરિયાના કિમ મિન-સિઓંગને 4-0થી હરાવીને ગોલ્ડ મેડલ જીત્યો. તેના બરાબર એક મિનિટ પહેલા સુજીત કલકલેએ કુસ્તીની પુરુષોની 65 કિગ્રા ફ્રીસ્ટાઇલ કેટેગરીમાં ગોલ્ડ મેડલ જીત્યો હતો.
સુજીતની ફાઇનલ ખૂબ જ રોમાંચક રહી. એક સમયે તે 2-9થી પાછળ હતો અને માત્ર 1 મિનિટ 40 સેકન્ડ બાકી હતી. ત્યારબાદ તેમણે સતત ટેકડાઉન કરીને ઝડપથી ત્રણ વખત 2-2 પોઇન્ટ મેળવ્યા અને સ્કોર 8-9 સુધી પહોંચાડ્યો. અંતિમ 11 સેકન્ડમાં વધુ એક ટેકડાઉન કર્યું, જેનાથી તેમને 2 પોઇન્ટ મળ્યા અને સ્કોર 10-9 થઈ ગયો. આ સાથે તેમણે ગોલ્ડ મેડલ જીતી લીધો.
મહિલા બોક્સિંગમાં પણ ભારતે ઇતિહાસ રચ્યો. પરવીન હુડ્ડાએ 65 કિગ્રા વેઇટ કેટેગરીમાં ચીની બોક્સર ચિન ચેનને હરાવીને ગોલ્ડ મેડલ જીત્યો. પાંચમાંથી ત્રણ જજોએ તેમના પક્ષમાં નિર્ણય આપ્યો. બીજી તરફ લવલીના બોરગોહેને 75 કિગ્રા કેટેગરીની ફાઇનલમાં ચીની બોક્સર બાઓ જીયીને 5-0થી હરાવીને ગોલ્ડ મેડલ જીત્યો. પહેલા બે રાઉન્ડ પછી લવલીના થોડા આગળ હતી, પરંતુ અંતિમ રાઉન્ડમાં તેમણે એકતરફી દબદબો જમાવ્યો.
આ સાથે પહેલીવાર ભારતની બે મહિલા બોક્સરોએ એક જ એશિયન ગેમ્સમાં ગોલ્ડ મેડલ જીત્યો છે. આ પહેલા મેરી કોમે 2014માં ગોલ્ડ મેડલ જીત્યો હતો. અંકુશના ગોલ્ડ સાથે ભારતીય બોક્સિંગના કુલ 3 ગોલ્ડ મેડલ થઈ ગયા છે.
સવારે ભારતીય મહિલા તીરંદાજી ટીમે રિકર્વ કેટેગરીમાં ગોલ્ડ મેડલ જીત્યો હતો. આ સાથે ભારતના કુલ 15 ગોલ્ડ મેડલ થઈ ગયા છે અને મેડલ ટેલીમાં ભારત 5માં સ્થાને પહોંચી ગયું છે.