ટીવી એક્ટર અર્જુન બિજલાની અને તેમની પત્ની નેહા સ્વામી હાલમાં રિયાલિટી શો 'ધમાલ વિથ પતિ, પત્ની ઔર પંગા સીઝન 2'માં જોવા મળી રહ્યા છે. દિવ્ય ભાસ્કર સાથેની વાતચીતમાં અર્જુને સલમાન ખાન માટે છોકરી શોધવા અંગે રમુજી અંદાજમાં કહ્યું કે, 'આ કામ મુશ્કેલ જ નહીં, પરંતુ અશક્ય છે.'
અર્જુન અને નેહાએ સિંગલ રહેવાના ફાયદા અને લગ્નજીવનના પડકારો અંગે પણ ખૂલીને વાત કરી. બંનેએ એકબીજાના ગુણો, આદતો, ગુસ્સાના કારણો અને સંબંધમાં થતી નાની-મોટી નોકઝોકના રસપ્રદ કિસ્સા શેર કર્યા. વાતચીત દરમિયાન તેમની કેમેસ્ટ્રી અને રમુજી અંદાજ પણ જોવા મળ્યો.
અર્જુન બિજલાની અને નેહા સ્વામીએ 20 મે 2013ના રોજ લગ્ન કર્યાં હતાં.
પ્રશ્ન: શોમાં આવ્યા બાદ તમને એકબીજા વિશે એવી કઈ વાતો જાણવા મળી, જેને તમે પહેલાં નજરઅંદાજ કરી દેતા હતા?
અર્જુન: મને શોમાં આવ્યા બાદ જાણવા મળ્યું કે નેહા મારી સાથે ખૂબ પંગા લે છે. મને નહોતું લાગતું કે તે શોમાં આટલા પંગા લઈ શકે છે. મજેદાર વાત એ છે કે, તે પંગા પણ લે છે અને પછી ના પણ પાડી દે છે. તે પહેલાં આવું કરતી નહોતી. મને લાગે છે કે, કલર્સવાળાઓએ તેને ઉશ્કેરી દીધી છે કે બસ પંગા જ કરવાના છે.
નેહા: અર્જુન મને ખૂબ પ્રેમથી રાખે છે. પરંતુ મને શોમાં તેમની સાથે થોડી અલગ રીતે નોકઝોક કરવામાં મજા આવી રહી છે. આટલા વર્ષોમાં જે વાતો મનમાં સચવાઈ ગઈ હતી, કદાચ તે આ શોના માધ્યમથી બહાર આવી રહી છે.
પ્રશ્ન: તમે બંનેની નોકઝોક ઘણી વાસ્તવિક લાગે છે. શું ઘરમાં પણ આવું જ વાતાવરણ રહે છે?
અર્જુન: હા, અમારી વચ્ચે આવી જ નોકઝોક થાય છે. આ બધું બનાવટી નથી. નેહા મારી સાથે પંગો લેવામાં સંપૂર્ણપણે સામેલ રહે છે. તેમની વાતો અને તેમનો અંદાજ જોઈને લાગે છે કે તેઓ ખરેખર મારી સાથે દલીલ કરી રહ્યાં છે.
નેહા: અમે ઝઘડો નથી કરતા, પરંતુ મજાક-મસ્તી કરીએ છીએ. અમારી નોકઝોક ખૂબ જ પ્રેમાળ હોય છે. એવું નથી કે શૂટિંગ પછી હું અર્જુનને કહું કે તમે આવું કેમ કહ્યું. અમે બંને તેને હસી-મજાકમાં લઈએ છીએ.
પ્રશ્ન: એકબીજાની એવી ત્રણ ખૂબીઓ જણાવો, જેના પર તમે બંને આજે પણ ફિદા છો?
નેહા: અર્જુન મને સરપ્રાઇઝ આપવામાં ખૂબ સારા છે. ક્યારેક હું સૂતી હોઉં ત્યારે તેઓ મારા માટે ફૂલો રાખી દે છે. ક્યારેક મારી પસંદનું ભોજન ઓર્ડર કરી દે છે. તો ક્યારેક એવી જગ્યાએ જવાનો પ્લાન બનાવી લે છે, જ્યાં જવાની અમારી ઘણા સમયથી ઇચ્છા હોય છે. તેઓ હંમેશાં કંઈક ને કંઈક કરતા રહે છે.
જ્યારે હું મારી બહેનપણીઓને કહું છું કે અર્જુને મારા માટે શું કર્યું, ત્યારે તેઓ કહે છે કે તેઓ કેટલા પ્રેમાળ છે અને કાશ તેમને પણ આવો પાર્ટનર મળે. હું તેમને કહું છું કે મને તો મળી ગયો છે. અર્જુન ખરેખર ખૂબ જ ખાસ છે.
અર્જુન: મને લાગે છે કે નેહા ઘરના વાતાવરણને ખૂબ ખુશનુમા બનાવી રાખે છે, ખાસ કરીને જ્યારે તેઓ સારા મૂડમાં હોય છે. તેમનો બીજો ગુણ એ છે કે તેઓ આખા પરિવારની ખૂબ સારી રીતે કાળજી રાખે છે. તેઓ મારી માને ફોન કરે છે, તેમની સાથે સમય વિતાવે છે અને તેમની દરેક નાની-મોટી વાતનું ધ્યાન રાખે છે.
ઘણી વાર તે મારી પહેલાં મારી માતાને પોતાની વાતો કહી દે છે અને પછી માતા મને ઠપકો આપે છે. પરંતુ મને નેહાની આ આદત સારી લાગે છે. પરિવારને સાથે લઈને ચાલવું ખૂબ જ જરૂરી છે. આ ઉપરાંત, નેહા મને પણ સરપ્રાઇઝ આપતી રહે છે. એક વાર હું શૂટિંગ પરથી ઘરે પાછો ફર્યો, ત્યારે તે સાડી પહેરીને પૂજાની થાળી લઈને ઊભી હતી. તે મારી સાથે મજાક કરી રહી હતી. મને લાગે છે કે સંબંધમાં એકબીજાને સરપ્રાઇઝ આપવાની ઇચ્છા હંમેશાં જળવાઈ રહેવી જોઈએ.
પ્રશ્ન: એકબીજાની એવી કઈ આદત છે, જેને તમે બદલવા માંગો છો?
અર્જુન: નેહા ખૂબ ઊંચા અવાજે વાત કરે છે. તેના અવાજથી મારા કાન દુખવા લાગે છે. તે ધીમેથી વાત કરતી નથી.
નેહા: મને લાગે છે કે જો હું ધીમેથી બોલીશ, તો તેમને મારી વાત સંભળાશે જ નહીં. તેથી મારે ઊંચા અવાજે બોલવું પડે છે. બીજી આદત જે હું બદલવા માગું છું, તે એ છે કે રાત્રે ટીવી ચાલુ રાખીને સૂઈ જવું. જ્યારે હું અડધી ઊંઘમાં ટીવી બંધ કરું છું, ત્યારે તેમની ઊંઘ ઊડી જાય છે. પછી તેઓ પૂછે છે કે ટીવી કેમ બંધ કર્યું. હું આ આદત કોઈપણ રીતે બદલવા માગું છું. તેના માટે મારે 10 દિવસનું વ્રત પણ રાખવું પડે તો વ્રત રાખીને આ આદત છોડાવી દઈશ.
પ્રશ્ન: શું શો દરમિયાન ક્યારેય એવું બન્યું છે કે એકબીજાની કોઈ વાત સાંભળીને તમને લાગ્યું હોય કે હવે ઘરે જઈને તેના પર ચર્ચા કરવી પડશે?
નેહા: હજી સુધી એવું કંઈ થયું નથી.
અર્જુન: અમે બંને ઘણાં વર્ષોથી સાથે છીએ, તેથી એકબીજા વિશે લગભગ બધું જ જાણીએ છીએ. અમારી વચ્ચે છુપાવવા જેવું કંઈ નથી.