સફરજન ખાતી વખતે ઘણી વાર ભૂલથી તેના બીજ ગળી જવાય છે. શું આ બીજ ખરેખર ઝેરી છે? નિષ્ણાતોના મતે સફરજનના બીજમાં એમિગ્ડાલિન નામનું રસાયણ હોય છે, જે શરીરમાં પાચન થતાં હાઇડ્રોજન સાયનાઇડ બનાવી શકે છે. આ સાયનાઇડ એક ખતરનાક ઝેર છે, જે શરીરના મહત્ત્વના અંગોને નુકસાન પહોંચાડી શકે છે. પરંતુ શું ભૂલથી ગળી ગયેલા એક-બે બીજથી ગભરાવાની જરૂર છે?
ડોક્ટરોના જણાવ્યા અનુસાર, જો બીજ આખું ગળી જવાય અને ચાવવામાં ન આવે, તો શરીરમાં ઝેરની અસર થવાનું જોખમ ઘણું ઓછું રહે છે. કારણ કે આખા બીજનું આવરણ પાચનક્રિયામાં તૂટતું નથી. જોખમ ત્યારે ઊભું થઈ શકે છે જ્યારે મોટી માત્રામાં, લગભગ એક કપ જેટલાં બીજ ચાવીને ખાવામાં આવે. સામાન્ય જીવનમાં આવું થવાની શક્યતા ખૂબ જ ઓછી છે.
સફરજનની છાલમાં ભરપૂર પ્રમાણમાં ફાઇબર હોય છે, જે શરીર માટે ફાયદાકારક છે. તેથી સફરજન ખાતી વખતે અંદરના બીજ કાઢી નાખવા વધુ યોગ્ય છે. કોઈ અનાવશ્યક ભય રાખ્યા વગર તમે આ પૌષ્ટિક ફળને તમારા રોજિંદા આહારમાં સામેલ કરી શકો છો.
નોંધ: આ સમાચારમાં આપવામાં આવેલી માહિતી સામાન્ય જાણકારી પર આધારિત છે. કોઈપણ આરોગ્ય સંબંધિત ચિંતા હોય તો ડોક્ટરની સલાહ લેવી.