આજે સ્માર્ટફોન આપણા જીવનનો એક મહત્વનો ભાગ બની ગયો છે. તેમાં અંગત ફોટા, મહત્વના દસ્તાવેજો અને ઘણી ખાનગી માહિતી સંગ્રહિત હોય છે. ખાસ કરીને iPhone માં પાસકોડ અને Face ID જેવી કડક સુરક્ષા વ્યવસ્થા હોય છે. પણ એક સવાલ થાય કે જો iPhone વાપરનાર વ્યક્તિનું અવસાન થાય, તો તેના Apple Account નો ડેટા તેના પરિવારજનોને કેવી રીતે મળે? આ માટે Apple એ 'Legacy Contact' ફીચર ઉપલબ્ધ કરાવ્યું છે.
Legacy Contact એટલે શું? સરળ શબ્દોમાં કહીએ તો, તમે તમારા જીવનકાળ દરમિયાન જ કોઈ વિશ્વાસુ વ્યક્તિને નોમિની બનાવી શકો છો. તમારા મૃત્યુ પછી તે વ્યક્તિ તમારા Apple Account ના ચોક્કસ ડેટાનો એક્સેસ મેળવી શકે છે. આ સુવિધા iOS 15.2, iPadOS 15.2 અને macOS 12.1 કે તેના પછીના વર્ઝનમાં ઉપલબ્ધ છે. તમે તમારા પરિવારના સભ્ય કે વિશ્વાસુ મિત્રને લેગસી કોન્ટેક્ટ તરીકે ઉમેરી શકો છો.
આ માટે Apple એક 'Access Key' આપે છે. આ કીનો ઉપયોગ ફક્ત મૂળ યુઝરના મૃત્યુ પછી જ થઈ શકે છે. જ્યારે લેગસી કોન્ટેક્ટ ડેટા મેળવવા માટે Apple ને વિનંતી કરે છે, ત્યારે તેણે માન્ય સરકારી દસ્તાવેજો (જેમ કે મૃત્યુ પ્રમાણપત્ર) સાથે આ Access Key પણ જમા કરાવવી પડે છે. એટલે કે, ફક્ત નામ ઉમેરવાથી કોઈને તરત જ ડેટા મળતો નથી. Apple ની ચકાસણી પ્રક્રિયા પૂરી થયા પછી જ ડેટા સુધી પહોંચ આપવામાં આવે છે.
લેગસી કોન્ટેક્ટને કયો ડેટા મળે છે? તેને Apple Account ના ફક્ત ચોક્કસ ડેટાનો જ એક્સેસ મળે છે. એવું નથી કે તેને આખા એકાઉન્ટનો દરેક હિસ્સો મળી જશે. Apple ની પોલિસી મુજબ અત્યંત સંવેદનશીલ માહિતી અને ખરીદેલા કન્ટેન્ટનો એક્સેસ આપવામાં આવતો નથી. ઉદાહરણ તરીકે, iCloud Keychain માં સુરક્ષિત રાખેલા પાસવર્ડ્સ અને ખરીદેલું મીડિયા કન્ટેન્ટ (જેમ કે ફિલ્મો, સંગીત કે એપ્સ) આમાં આવતા નથી. આથી આ સુવિધાને iPhone નો પાસકોડ જાણી લેવા કે ફોનનું લોક તોડી નાખવા સમાન ન ગણવી. લેગસી કોન્ટેક્ટનો હેતુ મૃત્યુ પછી મહત્વના ડિજિટલ ડેટાને નિયત સરકારી અને ટેકનિકલ પ્રક્રિયા દ્વારા સંભાળવાનો છે.
iPhone કે iPad માં Legacy Contact કેવી રીતે સેટ કરવું? જો તમે અગાઉથી લેગસી કોન્ટેક્ટ સેટ કરવા માંગતા હોવ, તો આ સરળ સ્ટેપ્સ અનુસરો:
1. તમારા ડિવાઇસનું Settings ખોલો.
2. સૌથી ઉપર તમારા નામ અથવા Apple Account પર ટેપ કરો.
3. Sign-In & Security વિકલ્પમાં જાઓ.
4. હવે નીચે આપેલા Legacy Contact વિકલ્પ પર ક્લિક કરો.
5. Add Legacy Contact પર ટેપ કરો.
6. Face ID, Touch ID અથવા ડિવાઇસના પાસકોડ વડે તમારી ઓળખ કન્ફર્મ કરો.
7. હવે તમે જે વિશ્વાસુ વ્યક્તિને પસંદ કરવા માંગો છો તેને લેગસી કોન્ટેક્ટ તરીકે ઉમેરો.
8. સેટઅપ પૂર્ણ થયા પછી Apple તરફથી મળતી Access Key ને પ્રિન્ટ કરીને કે સુરક્ષિત જગ્યાએ સાચવીને રાખવી અનિવાર્ય છે, કારણ કે ભવિષ્યમાં ડેટા ક્લેઇમ કરતી વખતે તેની જરૂર પડશે.
Mac માં Legacy Contact કેવી રીતે સેટ કરવું? જો તમે Mac કોમ્પ્યુટર કે લેપટોપનો ઉપયોગ કરો છો, તો ત્યાંથી પણ આ સેટિંગ કરી શકાય છે:
1. સ્ક્રીન પર સૌથી ઉપર આપેલા Apple Menu પર ક્લિક કરી System Settings માં જાઓ.
2. તમારા Apple Account પર ક્લિક કરી Sign-In & Security સેક્શન ખોલો.
3. અહીં Legacy Contact નો વિકલ્પ જોવા મળશે.
4. Add Legacy Contact સિલેક્ટ કરીને માંગવામાં આવેલી માહિતી ભરો.
5. Touch ID અથવા તમારા પાસવર્ડ દ્વારા ઓળખ ચકાસો.